 |
| 要望向同一方向,真係好難 :) 相片連結 |
今日一早就同3隻豬仔去街街, 雖然有陽光, 但唔係好曬, 而且仲好好風, 吹住非常舒服; 再者佢哋都有需要曬吓太陽啦, 只要唔係暴曬, 都對健康有益無害, 尤其係達達豬, 曬太陽對佢毛髮生長係好有利, 依家唔係炎夏, 睇準時間, 就要帶佢出去曬太陽啦!
一開始都係叫工人姐姐推車仔, 然後比佢哋一隻隻輪住落地, 都係我拖波波行先, 費事佢小氣喇!
拖住波波跑咗兩圈, 跟住輪到達達, 佢一定唔會跑, 都係慢慢咁行; 最後就到豆b喇, 佢晌車仔上已經嘈咗好耐, 嘈住要落地行!
呢隻豬永遠得頭威頭勢, 一放落地好似隻電兔咁跑, 跑咗一轉就賴住唔郁, 點都唔肯再行; 算啦今日都夠晒運動量喇, 見到咁好風咁舒服, 又無其他狗狗行, 就放晒佢哋3隻一齊落地透吓, 等佢哋吹吓風啦!
姐姐就拎住相機想同佢哋影番幾張相, 但喺外面真係好難控制, 佢哋好奇心又大, 每個路人經過都係一個誘惑, 佢哋隻隻都朝住唔同方向, 向左走向右走啦!
我拖住佢哋手忙腳亂, D拖繩都纏埋晒喇, 就算拎住零食引誘都唔work呀, 佢哋對外面興趣比對零食更大, 我完全叫唔到佢哋停低影番張相!
呢個時候都吸引咗好多街坊圍觀喇, 有個婆婆好肉緊, 佢叫我哋要咁要咁, 又對住姐姐教佢咁唔得架, 姐姐又唔明佢講乜嘢, 我睇住佢哋兩個嘅表情, 真係好好笑, 佢哋構通有困難; 婆婆最後走過嚟問我拎咗粒零食自己去引佢哋, 仲好熱心咁蹲高蹲低; 跟住又有個嬸嬸走埋嚟幫手, 引佢哋望向鏡頭喎, 3隻豬仔見到陌生人的確靜咗落嚟, 姐姐都成功咁幫佢哋影咗幾張相喇, 婆婆同嬸嬸睇咗相都滿意, 仲好開心!
多謝晒街坊幫手喇, 都多謝3隻豬仔令到大家都咁開心!!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
