 |
| 要好好珍惜同佢哋共處嘅時間！ |
牙痛暫時緩和落嚟, 無再痛得要死, 食咗幾日消炎止痛藥開始見效, 不過都係要認真處理, 唔想再試呢種滋味啦; 已經約好牙醫星期一我就要去受死喇, 真係好怕好怕要見牙醫, 唉!!
呢兩日都係留喺屋企, 將D物件整理, 好多嘢唔郁就唔發覺, 要整理就好大問題; 今日集中整理所有嘅相簿, 我諗我全個屋企, 最多係呢D喇; 其實數碼年代, 好多人都放棄去晒相出嚟, 又要霸佔空間, 又唔會時常拎出嚟睇, 但我就係鍾意手中拎住相簿揭吓揭吓嗰種感覺, 同喺電腦咁睇, 係兩種滋味!
由於幾隻豬仔相片真係太多, 好難一下間睇到佢哋幾年間嘅變化, 今日就抽起每年影嘅部份過節相片, group埋一齊; 咁起碼每年都可以做個對比, 可以清楚睇到每一年佢哋嘅改變有幾多啦; 佢哋嘅一生只得十數年光境, 相片中嘅改變提醒我要好好珍惜, 同佢哋每日相聚嘅日子!
 |
| 揍波波番屋企當日，個樣同依家有無少少相似？ |
 |
| 一晃眼就過咗６年，嘴邊都白咗喇，一個唔短嘅日子！ |
今日有好大感觸, 從網中得知有網主嘅狗狗將要走喇!
我一直都有追開某個寵物網, 其中某網主A每日都分享佢狗狗患病狀況, 從最初懷疑患病, 到確診有糖尿病, 都有好幾年; 其間狗主從無吝嗇同每個人分享經驗, 佢明白狗狗開始患病係有幾徬徨; 從點樣調較針藥, 點樣從耳仔採血, 分享餐單等等, 我完全感受到佢對狗狗深深嘅愛!
有時照顧幾隻豬仔, 得唔到預期效果, 情緒低落; 當我睇到呢位網主鍥而不捨嘅精神, 都會對我係一種鼓勵!
喺短短近呢一個月期間, 從狗狗唔肯進食, 佢開始無晒主張, 係咁頻頻撲撲, 送狗狗留醫, 驗血, 一切做得嘅都去做; 但今日得悉結果, 狗狗胰臟有腫塊, 呢個壞腫塊好惡, 吸哂狗狗嘅血, 仲好快伸延, 而醫生判斷做手術勝算唔高,又要輸咗血先可以做, 但風險係極大…
我一路睇一路好心痛, 佢話仔仔唔食得, 無晒力, 連撐起身都有困難; 既然搵到答案, 再堅持都係無用!
佢話唔要佢仔仔再受一分鐘痛苦, 聽日就帶狗狗去一個再無痛苦嘅地方......
我佩服佢立場明確堅定, 所有嘅痛留番比自己承受, 只要仔仔唔再痛！
天知道落呢個決定有幾難!!!天知道親身送仔仔上路有幾痛!!!
佢係一個滿分嘅狗媽媽, 呢件事我從來都做唔到; 睇完佢短短斷腸數語, 我除咗無語流淚, 都唔知講咩好!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
