 |
| 相片連結: Halloween 2012 (2) |
琴日參加咗fb網上一個比賽, 呢個係第二個我以狗狗為題參與嘅比賽, 我一向都唔會主動參與任何比賽活動嘅!
多年前第一個比賽, 都係同今次一樣, 只係upload咗豬仔嘅一張相; 嗰個就係之前我提及過, 已經消失咗嘅寵物網; 網主好誠意邀請, 我亦唔堅持拒絕; 今次我都抱住同上次相同心態, 參與比賽唔係要嬴, 純係支持朋友呢個活動, 友誼萬歲(希望唔係我一廂情願啦, 哈哈)!
從養狗狗開始, 我認識咗好多新朋友, 有從網上開始, 跟住見面, 一齊交遊, 由網友開始去到可以電話交談分享, 進而見面, 咁我就視佢哋為結交咗嘅新朋友架喇; 亦有從放狗其間認識嘅街坊朋友, 有一兩位志同道合, 仲交換埋電話電郵!
要多謝幾隻豬仔, 因有佢哋擴闊咗我嘅世界 :)
再講番比賽, 我真係好欣賞朋友有呢個魄力, 去推動一件事情進行, 比我真係欠缺呢份衝勁; 所以我一定參與鼓勵, 以表支持!!
養咗波波達達咁多年來, 佢哋嘅相片都唔知從乜嘢途徑, 不覺間有D流傳出外, 我亦曾經被一兩個機構邀請, 話想同佢哋出本月曆, 做個訪問等等!
講真我好清楚我豬仔嘅個性, 佢哋出去一定會好緊張, 仲要到陌生地方見咁多陌生人, 真係嚇死佢哋都有份, 而要出動去做訪問影相, 想都要花上唔少時間, 要佢哋咁勞累, 為乜因由?
即使係我哋朋友間去影樓影相, 我都覺得佢哋好唔自然, 好唔enjoy嘅, 我參加係因為難得有個場地, 比佢哋一群朋友仔可以聚聚, 有D社交, 而我哋呢班狗媽媽又可以聚吓傾吓嘛:)
從來影相我覺得自己算係最可以捉到佢哋嘅神態, 因為時間多嘛, 唔ok咪第日影過囉:)
不過可惜我係無技術可言, 無燈光特效, 又無靚相機輔助, 只係亂影一餐; 不過咁都無所謂啦, 我都係想自己娛樂吓, 喺唔太辛苦佢哋嘅大前題下, 影相都係留番比我啦!
今日工人姐姐放假, 唔同佢哋出去喇, 再嚟影多幾張萬聖節相啦 :)
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
