 |
| 3隻豬仔跑得幾開心 :) 相片連結 |
琴日無帶3隻豬仔出去, 今日點都唔可以賴貓喇, 一於出去同佢哋行餐飽; 都係波波行先, 一落地佢就係咁跑, 連帶我都要被逼一齊跑埋! 可惜跑咗一條街, 一轉彎就見到隻放繩大大狗喇, 真係激死, 唯有回身行番轉頭!
真係好鬼憎D人唔拖繩嘅, 永遠都唔會諗下其他人, 仲要隻狗神高神大, 好得人驚嘛; 陣間意外走失, 又嗌晒救命, 如果唔係可憐狗狗有機會淪為流浪狗咁淒涼, 呢類自私嘅主人, 真係唔值得幫!
掉轉頭比達達行番一round啦, 點知一轉彎又見番隻大狗, 真係無mood再行! 唯有兜番上平台, 睇下今日好唔好運, 希望遊樂場無小朋友, 咁可以比佢哋自由行!
可能上天幫忙, 今日平台好靜, 有可能係午飯時間, 又有可能小朋友未放學返嚟; 快快把握時間比佢哋跑番陣啦, 不過3隻豬仔放咗繩無晒方向感, 完全唔識行; 唯有我帶住佢哋跑啦, 係咁跑呀跑, 都跑咗好耐, 跑到我腳都軟埋; 不過見佢哋咁開心, 就無所謂喇, 就當我都乘機做吓運動啦 :)
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
