工人姐姐離開嘅日子越嚟越近, 當然唔駛諗都越嚟越無心肝, 每次同佢講嘅嘢聽咗都無做, 問佢就好似發緊夢未醒咁; 但我又唔會好激心喇, 因為一切都在意料之內, 亦都想好嚟好去, 所以對一切正常應該好唔開心嘅事, 都份外包容; 對於3隻豬仔嘅嘢, 我完全謝絕佢幫手喇, 怕咗佢亂晒龍!
有時會諗點解可以咁都心平氣和, 明明好多嘢都好離譜喇, 如果新嘅工人姐姐嚟咗, 有無可能咁包容; 結果答案係唔得嘅, 簡單嚟講每個人心中都有把尺, 喺特定環境就會拎出嚟用!
例如一D規則問題, 我哋自己番工都要遵守嘛, 無可能話每日遲到早退咁放縱啦; 姐姐依家明顯係唔上心喇, 每朝都訓到唔識醒, 要我日日做佢個鬧鐘; 放假日子更唔駛講, 完全唔記得要幾點鐘番嚟！
我哋中國人都希望好頭好尾, 要離開會做得更好, 就如我當日決定離職, 我都希望最後留下美好嘅回憶嘛!
唔通異族唔興呢家嘢? 見佢放慢手腳, 乜都唔上心, 好似游魂咁真係好無奈; 仲有就係依家D姐姐態度好惡劣, 永遠唔會謙虛有禮同僱主對話, 一開聲就起晒杠, 永遠大聲蓋過你; 可能依家真係工人太渴市喇, 世界唔同咗, 去D僱傭天地睇吓, 大家都叫死忍, 唔太過份都唔想自己唔開心!
呢幾個月要改變方針喇, 唔可以預先同佢講, 明日要做乜嘢, 要好似即食麵咁, 即泡即用啦:(
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
