 |
| 對twins好開心,達達就情緒唔好 :( 相片連結 |
都有幾日無寫blog囉, 真係好少可, 原因係無晒mood啊!
之前南丫島撞船事件, 心裏面真係好唔安樂, 點諗到高高興興咁出海睇煙花, 一轉瞬竟成永訣!
心情有D低落, 琴日仲睇埋演員惠天賜突然暴斃, 深感生命係幾咁脆弱, 生命有幾長短? 可以一息間就走完!
近來都有D雞毛蒜皮嘅小麻煩事, 但都係需要時間處理!
工人姐姐完約在即, 我要好好將一切從新整理, 唔係一旦佢離開屋企, 就唔知去邊度搵番D嘢出嚟, 真係一做起上嚟就知幾索氣, 姐姐將D嘢東一件, 西一件咁放, 全無組織可言, 好彩我都提早打算, 唔係佢走咗我搵到出嚟先離奇!
唔通真係我要求高? 好難想像依家D工人做嘢可以咁求其 :(
雖然人口簡單屋又唔大, 但零碎雜物執起嚟撒滿一地, 要花好多精力去處理, 呢幾日真係攰到要死!
再嚟又煩唔識放相上網, 好彩問咗阿女, 原來根本無事, 只係fb個setting轉咗, 我呢D電腦白痴就唔識搵番條link出嚟, 嗰日用ipad又睇唔到相喎, 咁就自己騰雞:)
依家呢樣總算攪掂咗喇, 無法啦! 自己蠢, 攞嚟煩:(
都有幾日無同3隻豬仔出去喇, 琴日見天氣涼涼哋, 就同佢哋出去行吓, 大家都減吓壓啦!
但一出去我又尷尬到死喇, 波波可能係幾日無出去, 一出去又亂吠一通; 明明都有餵咗花藥, 之前都有好好嘅成效, 都唔知點解又再度失控 :(
仲要唔止吠狗, 連大人細路都一樣吠......
達達心情又唔係好好, 又越嚟越少毛毛; 佢同去年甩毛時期一樣, 都係情緒好差又間中尖叫, 我總覺得會係內分泌問題影響, 但又無其他辦法, 做咗咁多都無好轉, 開始有D洩氣有D灰, 我都唔知可以再點做! 唉, 好似無件係好事, 樣樣都係咁negative :(
唯一好肯定出去行呢一轉, 大家都舒咗口氣, 心情無咁鬱悶, 對twins仲明顯好鬼開心 :)
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
