 |
| 相片連結 |
達達豬情況真係唔好, 見到佢行得咁差, 真係無晒心機喇; 又唔知佢邊度出事, 因為X'Ray係穿透唔到D軟組織啦; 從片中就睇到腳仔有問題, 但椎間盤有無事都係要由MRI去決定, 達達又似乎未去到呢步, 所以Dr.H建議達達見一見專科, 因為專科醫生見呢類嘅case多, 或者可以從X'Ray判斷係咩症狀, 會得到一個大概結果!
呢條短片見到達達行到左搖右擺, 真係心都實晒!見專科要等一個星期, 咁呢一星期我可以做D咩去幫佢? 要我咩都唔做, 坐喺度乾等, 呢個就唔係我啦!
問過Dr.H意見, 先從屋企做起, 放缸暖水比達達水中郁動手腳, H醫生話咁做對佢關節肌肉有幫助; 喺未確診前, 當然要休息多啦, 跟住困籠, 一段時間放佢出嚟尿尿, 按摩手腳, 3餐前後比佢自由行耐D啦, 完全唔郁動D腸都無蠕動, 會無便便㗎, 咁唔得啦!
跟住再諗要點去幫佢, 呢一個星期我都要積極揾料, 做D準備功課!
 |
| 帶氧微泡浴加強血液循環 |
 |
| 入籠先唔會跑 |
 |
| 放監咩都唔記得晒, 行到搖搖擺擺 |
Mi十分推薦順勢療法, 佢自己同朋友嘅狗狗都用咗順勢治療好耐, 佢話十分安全, 佢相信用順勢嘅藥加埋針炙會幫到達達, 唔一定要做手術叫我唔好咁灰, 如有需要可以比D有關藥物達達試; Mi比我好多意見, 關心, 支持, 安慰, 我會好好記住!
仲有A, 幫我睇達達X'Ray, 又搵其他嘅片做比較過我睇; 佢都覺得針炙可以試, 因為眼見都有好多成功例子; 有金毛犬椎間盤有事都選用呢個方法去醫治!
非常多謝A, 佢提到如果環境許可,時間配合到, 佢試吓從工作中閃出嚟陪我去見專科, 呢個係一個好大嘅支持!
咁當然首要顧及工作啦, 佢係一個有責任心人, 無可能遺下一個爛攤子比同事; 所以佢唔敢確定當日是否可安排交低工作.
不過無論成功與否, 我會牢牢咁記住呢份心意！
又要多謝我快將移民嘅姐姐, 佢都知我“蛇瓜”, 問要唔要佢抽時間陪我去; 行將移民都九佰幾樣嘢要攪啦, 佢都話最好一日有48小時; 我幫唔到仲點可以做成佢嘅負累!
無論如何, 都要感謝大家嘅精神支持!
關於順勢療法, K認為我可以自己選擇, 畢竟多一個嘗試啦; 但朋友都覺得比原始嘅達達見咗專科先較好, 如果用藥後可能遮蓋咗原有病情, 咁睇專科就無意思喇, 除非我選擇唔見專科唔要呢個專業意見, 咁可以隨時開始啦!
往往都係遇到難題就見到真朋友, 同道人先會有相同感受, 好慶幸認識咗你哋, 我會珍惜呢份志同道合嘅友誼!
好朋友, 好多謝你哋!
認識我嘅人都知, 我係一個超級路癡, 咩地方都唔識去, 即使去過一百次嘅舊路, 我都可以迷途; 一路以來都係要老公同朋友們帶路, 奈何狗狗突然有事, 就唔可以鋪排得咁好, 大家都有正職要做嘛!
每逢狗狗有事我真係份外徬徨, 孤軍作戰嘅滋味喺呢種時候深切感受到, 一般人唔會明白, 一隻狗點解要咁緊張, 講都徒勞！唔怪得近日有報導, 寵物離世會比老年喪偶更傷, 因為無渲洩嘅渠道！
老公比我仲要保守, 所有療法都有擔心, 針灸驚吉錯穴道, 食藥驚反應唔好, 開刀驚細菌感染....
我都知, 任何事物都有兩面, 但唔做治療唔通會自動好? 佢太錫達達無咗客觀嘅諗法, 同佢商量咩都幫唔到!
一於先見專科, book咗針灸之後去做, 順勢治療再下一步！
一個人又要擔心病情, 可能要做一D重大嘅決定真係壓力大, 又驚唔識路, 只可以靠晒架的士; 如果遇啱個司機仲要我帶路, 咁我就死實, 但又越嚟越多呢D司機 ;(
但為咗達達都要頂住, 奮勇行前!
 |
| 達達豬點解你要咁多事㗎！！！ |
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
