 |
| 搽油著衫等一晚, 第二日沖涼 |
3隻豬距離上次沖涼又兩個禮拜喇, 又到沖涼時間, 時間真係過得好似閃電咁快!
今日主力攪達達, 搽油後要用好多時間, 對twins就星期6先沖, 反正週末唔會去街街!
琴晚同達達搽咗油, 用咗好多油都好似唔見晒, 又唔覺得佢嘅毛毛吸收咗睇落油潤, 又唔覺D皮膚滑潺潺, 總之我就一路撥開毛髮一路搽, 毛毛睇落仍然一樣咁羊毛化, 但D油又唔見晒??
同佢按摩咗一段短時間, 著番件衫就放番佢落籠瞓覺, 一晚之後再沖涼, 希望早D做呢個療程, 甩毛唔會甩到好似上次咁慘!
 |
| 準備洗白白喇 |
其實甩毛都只係外觀問題, 日子耐咗我越嚟越習慣, 頂多咪著衫; 反而有D隱憂, 達達身體健康究竟係有咩問題, 佢往後嘅日子會辛苦嗎?
仲擔心佢情緒會唔會又變壞, 再見唔番佢個開心樣喇!
當然唔會單一甩毛就至死, 但我唔會否定因為身體內裡嘅問題, 誘發出一連串併發症, 如抽筋, 肝臟問題, 心臟病, 腎衰竭等等, 一如我以前嘅叻叻!
我以前無諗過呢D問題, 但自從加入咗呢個國際性嘅群組, 見到世界各哋嘅人講述佢哋脫毛症嘅狗狗, 有好大部份情況雷同, 應該唔會係巧合喇!知道咗都好D嘅, 點都算有個心理準備, 再者食D補充品, 排毒加強免役糸統, 希望有轉機啦; 我唔敢要求達達有15,6歲嘅壽命, 但我希望佢唔會好似叻叻咁辛苦啊!
沖完涼都略修毛毛, 靚靚豬女嚟喇 :)
今日沖涼達達唔係甩好多毛, 仲發覺佢肚仔有一噠黑毛淡化咗好多喇, 之前濕咗水好明顯, 但今日差不多見唔到; 睇嚟搽油噴神奇水對達達仍有一定效用, 希望今次佢keep到唔會甩得咁兇啦!
 |
| 呢一噠毛本來好黑㗎, 依家唔係好覺啦 |
琴晚入夜見到達達都有少少鼻水, 依家夜晚真係幾涼吓, 咁夜晚同佢哋著番件背心啦!
自從分隔開佢哋食餐, 真係少咗好多爭吵, 每隻豬各據一個地頭, 無再打交 :)
 |
| 聽到廚房準備晚餐, 好緊張喇！ |
 |
| 豆b走到廚房前, 達達心急但都係唔敢行出去 |
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
