 |
| 相片連結 |
今日天氣好好, 決定早D出去！
都係波波行先, 落地時就戴番太陽鏡, 佢已經唔會再亂撥亂抓, 習慣晒喇; 戴住太陽鏡嘅豬仔, 好吸引途人目光啦, 每次都遇到有路人話佢得意㗎; 但呢隻少爺仔從來都唔會停低比人影相, 拖住我係咁跑, 想同D街坊傾兩句都唔得啦!
我又一定唔會強行拖住佢停低比人影相嘛, 去街主要都係要令佢開心啦!
跟住到豆b行, shared咗波波個太陽鏡比佢戴, 已經訂咗另一個比佢, 下星期佢自己有獨立眼鏡啦; 無諗過兩隻豬仔都唔抗拒戴眼鏡㗎 :)
豆b有得去街街, 比少少零食就開心晒, 佢真係好樂天, 性格好可愛㗎！
都遇到途人要同佢影相, 大家都好有禮貌, 會問過我先; 互相尊重真係令人舒服, 只要豆b願意, 我OK啦; 如果佢好似波波咁要走, 我都唔會強迫佢㗎！
豆b真係親善大使, 人家一彎低身佢就自動行過去比人摸, 氹得D街坊好開心啦 :)
最後輪到達達, 匆忙間今日唔記得餵花藥, 本來都唔想太依賴, 但近日覺佢表現麻麻, 有D擔心佢唔敢行!
達豬今日行得算差, 行吓停吓, 要不時摸佢不斷鼓勵, 佢驚嘅時候我就要用兩隻腳傍住佢啦, 呢個係訓犬師教㗎！
希望達達唔會越嚟越差, 我會比D正能量幫佢加油啦！
行咗兩個鐘, 今日都好開心, 即使係達達, 回程時都放鬆咗好多喇！
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
