 |
| 相片連結 |
今日同對twins沖涼, 食完早餐就開始, 先沖豆豆啦!
豆b沖涼好乖, 完全無難度, 好快就沖好喇, 但一開始吹毛, 真係好麻煩; 唔係煩在佢兩頭郁, 係怕咗佢扯晒氣咁呀; 我吹咁耐佢就喘咁耐, 攪到我好擔心啦!
都唔敢一口氣咁幫佢吹, 要做吓停吓, 又餵佢飲啖水咁, 拖長嚟做啦, 真係怕咗佢啊!
攪到修毛都唔敢攪得耐, 佢一向都唔合作啦, 修圓咗個pat pat, 其他修少少算喇, 一拖就拖到午餐時間！
中段要暫停比佢哋食午飯, 又要等波波休息夠時間, 唔敢一食完就沖涼, 怕影響消化啦, 兩個鐘後再開始, 左等右等又無咗一日時間 :(
波波沖涼都好乖, 吹毛都合作, 佢聽我氹嘛; 但修毛都係難, 我又唔專業, 佢反應又大, 一拎起較剪佢就縮縮吓; 今日唔係好順利, 佢唔係每次都咁抗拒㗎, 都係修圓個pat pat就算數啦!
近來兩姐弟相處無問題, 我完全避開佢哋有搶食嘅時間, 原來解決唔到問題去選擇避開, 都係work啦; 只要唔加強呢個負面嘅行為, 係可以有正面影響嘅!
兩隻豬沖完涼, 仲一齊玩到咭咭聲 :)
佢哋之前打交真係令我好困擾, 依家叫做暫告一個段落喇!
又開始集中精神幫達達, 每日噴兩次神奇水按摩, 沖涼前搽油, 就做住咁多啦, 食用唔作改變喇, 因為都無咩唔妥, 希望咁樣慢慢拖過甩毛嘅季節啦, 我希望達達keep住開開心心, 我唔再諗咁多喇!
