小小萬人迷 (w/album)

咁樣甩法, 會幾耐甩光?

天氣漸涼, 達達又快變隻甩毛豬仔喇, 由佢毛質開始改變, 我都預咗呢個甩毛症又再循環!
每日同佢梳毛, 都用上唔少時間, 因為毛質變咗羊毛化, 會好容易糾結埋一齊; 我會先用個寬齒梳慢慢梳通佢嘅毛毛, 咁已經甩咗好多毛毛出嚟喇, 跟住再噴神奇水, 全身按摩後, 我全手又黐滿晒毛毛啦:(

自己都覺得唔妥!

之後再用豬鬃毛刷去慢慢刷, 幫助佢血液循環, 再清除咗D浮毛, 咁又一把; 本來甩毛唔算咩大件事, 但我知道佢已經停止咗新陳代謝;  咁每日一把一把, 幾耐又會甩晒?

唔係好開心啦!

幫3隻豬梳毛清潔眼耳口鼻, 一個早上就無晒, 比佢哋食完午餐, 休息夠就帶佢哋去街街!
 

波波行先, 陽光下戴住太陽鏡佢已經好習慣, 再無用手去撥, 行得好自然; 波波近來心情有好轉, 出去都無亂叫, 可能我有避開對佢嘅挑戰啦; 佢無見人就吠, 即使係小朋友, 佢表現都算自然; 當然, 如果個小朋友又指住佢又尖叫, 又或者向住佢衝前, 咁就神仙都難改變, 佢一樣會吠到癲!

相片連結

每次出去我都一定讓人哋落先, 盡量迴避小朋友,  當然途中有小朋友入, 我係無得改變; 其實怕嘅人可以選擇唔入嚟, 要入嚟又要高聲呼叫, 我可以點?我都放鬆心態, 咁情況下波波吠我都無能為力, 我會覺得唔係佢錯添; 有D安靜嘅小朋友入嚟, 我會擋一擋波波視線, 佢係唔會吠, 如果好似嘩鬼, 咁唔係我個仔嘅問題!

第二位我比豆b行, 因為方便share對太陽眼鏡, 費事放好又拎出嚟, 都諗住買多對比佢喇! 
豆b今日無事, 食嘢正常, 無再嘔喇, 可能琴日真係食得急啦; 呢隻豬好麻煩, 行吓停吓, 途人話佢好嗲, 要抱抱啦; 我話呢隻為食豬要攞食咋, 一比零食佢精神過鬼, 行得好快啦!

達達豬真係比之前差咗喇, 不過都總比早日好, 行得唔算太差; 不過佢要一直跟住架車仔先敢行, 信心無以前咁大喇！
唯有推住車仔帶佢行, 都無辦法啦！

 
達達豬真係個萬人迷, 每次出去都有人讚, 話佢又靚又乖, 哈哈! 
呢個小小萬人迷, 個樣又真係好得人鍾意嘅, 只要唔向佢伸手, 呢隻豬笑得好甜, 會冧C人㗎; 但想伸手摸佢, 佢會驚到變臉, 強行摸佢會反面, 大聲尖叫啦!

多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！