 |
| 臨走前影張相, 心情靚番晒 |
今朝要一早6點幾起身, 服侍3隻豬食早餐食藥, 因為今日要驗血; 驗甲狀腺素要食藥後4-6個鐘, 咁都無咩時間選擇喇, 7點食早餐然後11點左右驗血, 仲要等報告嘛; 要就住診所午飯時間, 最怕阻住人哋收工!
琴晚唔敢夜瞓喇, 雖然叫我早瞓真係無可能, 尤其係心情都係有不安, 最怕聽報告!
3隻豬出門前見到個袋爭住撲入去, 佢哋以為又去街街啦!
到達診所見到佢哋表情已經唔同, 3隻都震晒:(
波波打頭陣, 佢一向都係咁啦, 一定驚到騰騰震; 同佢抽血通常唔會一take過關, 佢總係猛縮手 :(
波波眼仔好多眼淚, 出外又瞇瞇眼咁, 我一直都唔放心, 今日再同Dr.H講出我嘅疑問; 佢話我可以去睇吓專科, 但佢認為係我過份擔心!
 |
| 嘈到我手騰脚震, 影到矇查查 :( |
今日再同波波check眼, Dr.H見我咁擔心, 就拎個儀器出嚟, 同波波check埋眼壓, 一隻眼係10、一隻14, 都係正常狀態; 佢話波波可能眼仔較大較敏感嗟, 叫我唔好自己嚇自己, 唔使再擔心!
咁CHECK咗我就安心啦, Dr.H真係好人!
跟住輪到豆b, 達達一定係押到最後, 佢咁惡死好得人怕 :)
真係諗唔到豆b越活越番轉頭, 一入診症室我一將佢過手比姑娘, 佢就大聲嗌, 聲音非常淒慘; 如果唔係我企喺隔離, 我一定以為佢比人打 :)
完全失控嘅豆b要安撫好耐, 佢仲差過波波, 唔止無一take過, 仲嚇到賴尿, 攪到地下同姑娘個身濕晒 :(
好唔容易抽到呢筒血, 打算如果report係正常, 下次隔耐D先抽啦, 見佢咁慘!
豆b心肺呼吸正常, 都係關節差啦!
到達達公主喇, 真係巴巴閉閉, 被一大群姑娘包圍, 佢一入去就嗌到嘈晒, 惡到想食人啦!
但一如以往佢係最聰明, 枝針一插入佢手就唔敢郁, 達達一take過關!
聽心肺正常, 眼仔無事, Dr.H話好開心針灸可以幫到達達, 要好好保養; 我話脚震問題都係攪唔掂, 我想試吓順勢療法, 佢無反對, 咁一試都無防啦!
跟住出去等報告, 波波達達都係自己坐落個袋袋, 隻豬豆就要老公抱住鍚番啦!
呢隻烈女幾時變得咁嬌嫩架, "烈女"要除名喇!!
3隻豬嘅報告麻麻, 都係正常中偏低, Dr.H話post- pill應該係高D架, 但都算可以接受, 唔算太差, 可能冬天係會低D啦.
原本諗住隔耐D先再驗血, 依家唔得啦, 半年後再去吉針喇!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
 |
| 豆B最巴閉啦, 要抱住錫番 |
