 |
| 相片連結 |
年三十晚, 今年忙得特別慘, 一早起身服侍三隻豬已成為習慣, 但直落無得再瞓番, 仲要應付咁多雜務我好唔慣 :(
餵完達達第一節藥有好短暫空檔時間, 即刻落超市買材料準備今夜晚飯後煮齋, 呢個餸我由細食到大, 唔想免除呢個習慣; 依家過時過節已經盡量簡化, 但想保留番少少傳統啦!
朋友話買材料點解唔叫工人去買, 奈何我呢位姐姐真係叻得好交關, 寫埋字googled埋圖片比佢參考, 佢都可以買錯晒; 我唔想年尾流流激到自己反白眼, 工人質素越嚟越差, 我都只好忍住道氣, 自己出馬 :(
出面人山人海想行快步都難, 又急住要趕下一節餵藥時間, 我跑到氣都喘晒!
番到屋企餵完藥準備佢哋食咗午餐, 等達達休息夠就要同佢沖涼, 因為食緊順勢藥物, 我今次唔用浴機喇; 要用dermagic shampoo同conditioner, 又辛苦D啦, 要洗完過得好清嘛, 唔係有殘留物會影響皮膚啦!
喺等待嘅時間, 叫姐姐推個吸塵機出嚟, 自己吸吓窗邊同玻璃, 然後再抹啦, 呢D工作都唔敢叫姐姐做喇, 怕咗佢將玻璃都敲散, 點知一見到吸塵機條喉管, 我真係火遮眼; 條喉穿咗個大窿, 係盲嘅都摸到啦, 佢無理由唔見卦!
我問佢知唔知已經整爛, 佢話知, 咁知點解唔講呀? 叫我今日去邊度配番? 今日已經係年三十晚!
佢仲每日都吸塵, 穿咗咁大個窿吸鬼吸馬咩; 依家D工人真係差, 差到唔識用筆墨去形容喇, 未親身感受真係以為天荒夜談; 每請一個都係每況愈下, 點解以前請嘅姐姐都可以做兩個約, 依家請個正常嘅咁難? 唔請又做死自己, 請就激死喇!
以為唔靠佢自己做番, 當佢機械人辦, 咁就無咁激心啦, 點知一樣係咁慘!
都無咁好氣再講再教, 收起道氣同達達沖涼啦!
每次沖涼都清楚見到達達毛髮越嚟越差, 佢依家正走緊下坡, 無得阻止㗎, 希望佢落到底可以一鼓作氣上番山啦; 現階段毛髮已經唔係我主要嘅concern, 我最希望係控制好佢椎間盤嘅病患, 會行得穩陣番; 呢個女咁多問題, 前路都係難行, 我唔敢再諗喇!
我雖然係緊張又騰雞, 但會面對困難, 積極搵解決辦法!
沖完涼同3隻豬再影多輯相, 馬年要同隻馬仔影嘛; 臨近過年如果遇啱阿女出trip, 佢都會喺機上買新年嘅生肖公仔, 今年去嘅地方唔夾, 只買到一隻咋!
3隻豬當然唔鍾意比我擺佈又影相啦, 都係笑容欠奉喇 :(
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
