今日開始幫達達試用順勢治療, 有D緊張!
星期一開始已經停晒一切輔助療法, 就試一個為期4週嘅順勢療程啦!
雖然順勢醫生幫達達配幾種藥, 為安全計, 都係一樣一樣咁試用, 食後有咩唔對, 都知道quit邊種啦, 好似穩陣D :)
之後無問題就可以組合埋一齊喇!
其實喺達達發現問題最始初, Mi有建議我用順勢療法去幫達達, 佢依家養緊嘅狗狗會避免去睇西醫用西藥, 佢十分推崇呢個治療; 佢之前養嘅狗狗做過兩次椎間盤手術, 後來死於腎衰竭, 佢話如果當日佢識用呢個療法, 佢一定幫佢嘅狗狗試咗呢樣先, 因為呢個係非入侵治療, 狗狗應該唔會咁辛苦啦!
後來佢認識咗其他狗友, 有肝病有甲狀腺病, 都無用西藥, 都係用順勢治療; 佢見朋友嘅狗狗用呢個治療驗血正常, 病情有好轉, 佢開始相信, 然後一路咁用, 成為咗順勢療法嘅擁躉!
對於一D自己唔熟識嘅治療, 我好有保留, 即使Mi強調呢個療法係安全無副作用, 但都係唔敢亂用嘛; 除非係傳統醫學已經幫唔到, 好似達達嘅脫毛症, 喺安全嘅情況下, 我都有尋求另類治療啦!
今次要多謝Mi嘅熱心幫忙, 先將達達無力步行, 下盤搖擺嘅短片send咗去澳洲, 比順勢嘅醫生睇過, 亦講清楚達達見過嘅專科確診係椎間盤有幾節窄咗, 兼且有膝關節移位問題, 有脚震同後盤無力, 對方醫生有回應建議達達食幾隻藥!
再多謝Mi幫忙訂藥, 訂藥後仲有一個好詳細嘅指引跟隨D藥番嚟, 比我多咗信心!
Mi叫我完全唔使擔心, 呢種藥唔會有副作用唔會食壞, 唯一係達達夾唔夾, 即係是否幫到佢啦!
問過幾個有呢方面認識嘅朋友, 都話藥性溫和, 試都無傷害嘅, 但就有幾樣嘢要留心; 用呢個藥就唔好用中藥喇, 咁達達暫停優視草眼仔補充品啦!
另外要停咗針灸, 由於針灸同樣係以剌激嘅方式嚟達到治療目的(只係使用唔同嘅工具) 咁會造成混淆不清, 令身體難以適應; 更唔可以做場效應治療, 因為磁場有干擾, 我會停埋艾炙同帶氧微泡浴, 喺一個全無干擾嘅環境下令呢種藥發揮到最好啦!
如果想瞭解多D呢個治療有幾條link可以睇吓, 不過如果正常情況下, 寶貝有病我都建議先睇醫生, 始終喺醫生監察下較好, 除非係無咩進展, 又或者要做一D入侵性嘅治療, 可以考慮有多一個選擇, 最好係先得到確診, 等順勢嘅醫生有個指標配藥啦!兜兜轉轉過兩個月, 最後都係要試順勢療法, 我真係好希望今次可以幫到達達!
因為呢D係另類藥物唔係補充品, 無必要長期服用, 我希望達達得到改善,一個療程後我就可以用番輔助療法去保養喇!
唉, 脫毛症又重臨, 條尾仔見到肉肉喇, 望住佢後盤無力又腳震, 再加埋條甩毛尾巴, 真係好down :(
唯有深呼吸再去打仗啦!
後記:寫呢篇blog嘅時候係我初用順勢療法, 所以比較緊張, 怕做錯嘛！
幾年落來, 我已經比較熟識, 無晒壓力, 亦有配合其他中西藥物,針灸, laser, 紅外線等幫佢哋喇, 只要隔開時間就OK喇！
http://www.holisticanimalmedicines.com/
http://www.homeopathy-forum.com/thread-473-1-4.html
http://www.boiron.com.tw/bravo-medical/homeopathy_movie02.html
http://www.homeopathy-forum.com/thread-13787-1-1.html
http://www.hahnemann.at/zh/diseases.html
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
聲明 **我喺呢個BLOG所提及嘅所有補充品同有關嘅醫療器材,用品,方法等, 並無收取任何廣告費用, 無任何得益。我唔係獸醫，只係一個同幾隻狗狗共同生活嘅普通人, 原意只想分享我用過嘅產品, 經驗，我養狗狗嘅心路歷程。 望比各主人作個參考咁, 不承擔任何責任。醫療上嘅問題, 請徵詢醫生!
但大家要明白,保健品嘅療效及保健用嘅方法, 對每個身體並唔一定有相同反應, 大家喺選擇嘅時候，自己要做多D資料搜集, 因為你先最瞭解你寶貝嘅身體; 最好先咨詢醫生, 確定對狗狗原有服用嘅藥物有無干擾, 千萬唔好盲目相信效用.
希望大家以安全為大前提下，為自己嘅狗狗選擇合適嘅保健品同保健方法。**
大家要小心, 所有保健品都有機會導致個別狗狗有敏感㗎！
