 |
| 相片連結 |
忙忙忙, 呢幾日真係忙到甩肶, 可能咁先夠意思, 記得以前我媽媽話過時過節要熱熱鬧鬧, 佢最鍾意過節逛街市喇!
香港人係咪真係壓力太大, 分分鐘都想打交, 前兩日我出街, 人又逼真係好得人怕; 話說企我前面嘅一位叔叔, 佢突然轉身行, 一脚踏落我腳面, 我本能就用手去格, 我怕佢收唔住勢會再撞過嚟啦; 呢位阿叔即刻聲大大, 瞪大對眼問我推咩推喎, 我話你已經踏到我, 我當然本能保護自己啦; 呢個阿叔一定係惡人谷長大, 如果佢唔係見我係女性, 我諗佢會打交, 依家D人真係燥火得可怕!
見到人山人海我真係好怕, 想當年我可以抱住兩個月大嘅阿女行年宵, 就算係人多但都有秩序, 唔會又推又撞, 郁吓都講打講殺; 年復年我從來都無停過行年宵呢個習慣，時日漸遠, 我都保留住呢種情懷; 但近幾年已經由年三十晚深夜去逛, 慢慢改變到年廿七, 再由晚間改日間, 改到近兩年無心機去逛喇 :(
感覺上人嘅包容度改變好大, 每個人都好似滿腔鬱結, 隨時都因一件微不足道嘅小事而爆發, 我無謂去淌渾水啦, 反正感覺同以前分別太大!
 |
| 兩隻女對隻舞獅好有興趣 :) |
達達自從開始食順勢嘅藥後, 我真係好唔得閒, 但感覺佢係有好嘅改進喇, 雖然佢仲係企定就脚震震, 但好彩係震一陣間; 希望佢唔會惡化, 完成療情後我可以鬆一口氣啦; 琴日見好好陽光, 中午有少少時間, 同3隻豬出去行咗一陣間, 番屋企前喺樓下影咗少少相, 佢哋都會笑吓, 唔似得喺屋企影相咁嬲爆爆, 佢哋一定覺得呢個媽媽好煩 ;)
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
