 |
| 相片連結 |
今日天氣好似無咁凍, 對twins唔再整日縮喺被竇, 有興趣郁動喇; 波波當然鍾情達達, 成日撩佢玩, 但達豬剛做完艾炙, 好想瞓覺; 豆b睇準機會過嚟撩波波, 喺咁情況下波波只好相就吓.
幸好有豆b陪吓細佬,波波都可以發洩吓啦!
自從達達脊椎有事, 活動量大減, 成日瞓覺, 脊椎問題加埋脫毛症一齊嚟, 佢一定係無晒心機喇, 除咗瞓覺佢都唔會鍾意玩; 即使佢唔瞓, 我都好怕波波會整親佢啦, 佢哋唔識就住大家嘛; 每次見波波撲向達達, 我都阻止, 其實波波都好悶呀, 達豬有事攪到一家都有壓力, 生活節奏完全唔同晒😟
每次脫毛周期佢一定唔開心, 我明白呢D應該關乎荷爾蒙影響咗佢嘅心態, 再加上脊椎問題, 真係好慘😟
究竟幾時會好番, 其實都知好難, 只希望佢會比目前進步D啦!
無間斷咁用神奇水不覺足一年喇, 呢隻產品係我咁耐以來用得最頻密, 亦係我比較喜愛, 從來無過異心; 雖然照睇達達嘅脫毛症都係再重臨, 用咗都補救唔到, 但起碼都未見皮膚有黑色素沉著, 亦無難聞嘅氣味喺個身啦!
我希望keep住同佢噴, 再加上帶氧微泡浴浸身, 會縮短佢脫毛嘅周期, 亦希望佢唔會甩到上次咁, 更希望毛毛甩咗都可以再重生!
慶幸嘅係佢上山、落山, 仲有氣力再循環, 落到低點又奮力再上山啦!
我依家繼續用各種方法去幫達達, 只不過係為佢打氣, 已經放棄咗要求佢停留喺山峰之上, 只希望盡我能力令佢有個好嘅體魄, 輕鬆D咁去再攀山!
再講番呢隻產品, 對其他皮膚問題都有幫助, 之前波波肚仔敏感, 佈滿紅點; 達達乳頭擦損腫脹, 豆b指間炎; 我都係噴、 噴、 噴; 完全無用過一粒藥, 雖然比起食藥可能要花更長時間, 但我肯定對身體唔會做成負擔啦!
好快用完又要補貨喇, 多謝Mi幫忙同我買埋, 仲攞到discount; 密密咁用真係幾重皮架, 慳得就要慳啦, 真係要精打細算啊!
今日Mi過嚟探達達, 拎埋神奇水比我, 佢狗狗依家用緊一隻精華素, 佢話補濕唔錯㗎, 噴濕皮毛按摩吓, 再浸牛奶浴, 佢話very good啦; 我對新產品真係有D怕怕, 諗起上次浸浴鹽攪到我好煩, 好怕D毛毛黐立立呀!
Mi今日拎咗嚟倒咗D比我, 咁我可以同達達試吓, 依家用咗浴機唔方便搽油, 真係想有D嘢幫隻豬滋潤吓, 佢毛毛開始乾旱喇!
多謝晒Mi, 希望達達今次啱用啦!
同3隻豬一齊出去行咗一陣, 達達都係行到衝衝吓咁, 佢都係信心麻麻, 腳仔都震㗎; 我就擔心佢咁衝法, 會扭傷脊椎, 只敢比佢行一陣, 我同佢都一樣壓力咁大 !
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
