 |
| 相片連結 |
天黑落雨, 呢個母親節氣氛好差; 3隻豬仔當然無得去街, 我就如常同佢哋做物理治療, 幫豆豆用紅外線燈照吓頸仔, 波波達達就照腰啦; 摸落波波達達打針嘅硬塊都仲未散, 有D擔心 :(
琴日問過Dr.H, 佢話瘋狗症針好容易有咁嘅情況, 如果腫塊越嚟越大, 就可能要睇吓醫生喇; 以前遇過有case裡面含膿, 抽出來send到化驗所種菌, 發覺到裡面有細菌呀; 觀察住有無變大, 同佢哋熱敷同按摩先啦; 打枝針都要我擔心一餐, 唉!
3隻豬唔出街街都係食飽就瞓, 我就今晚先同阿女食飯, 食我最愛嘅長腳蟹!
百無聊賴又上網, 點知 - 得到一個壞消息, 個心沉晒!
從網上得知有隻fox terrier狗狗, 今日去咗彩虹橋, 呢個母親節有個心碎嘅媽媽 :'(
好殘忍喺母親節遇到咁嘅事, 以後呢個媽媽都唔會有Happy Mother's Day 喇!
其實我唔認識佢哋㗎, 但一直有睇小狗媽媽寫嘅網誌, 呢隻小狗3個月左右就確認有先天性心臟病, 心臟科醫生診斷佢係唔會好番 , 只有越嚟越差; 病情可以穩定的話估計有3-6歲壽命, 如果惡化, 就只會得7-12個月命咋; 可以想像當時媽媽情緒一定崩潰喇!
呢幾年嚟, 佢媽媽對佢悉心照顧, 愛護有加, 一有少少毛病都緊張到不得了啦; 要檢查佢牙肉有無白, 又要檢查心跳有幾多下, 心律有無偏差!
照顧一隻有病嘅狗狗, 嗰種壓力有幾大我完全瞭解!
今日 - 小狗喺母親節離開咗媽媽喇 :'(
知道呢個消息個心好難受, 雖然互不相識, 但我睇咗咁多篇網誌, 對小狗好熟識嘛, 而且咁啱波波豆豆同佢係同一日, 都係9月6日生日㗎!
小狗今年4歲半, 如果唔係媽媽咁小心照顧, 佢唔會撐到今日; 睇到小狗短短嘅一生都喺愛嘅包圍下, 都不枉此生啦!
B! 願你帶住媽媽嘅愛好好上路, 連我呢個陌生人都感受到你媽媽係好鍚你㗎!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
