 |
| 相片連結 |
琴晚係第二晚2隻豬瞓新床仔, 前一晚瞓得咁好, 應該OK卦; 日間又比佢哋入去熟習, 應該越嚟越適應啦; 點知瞓到半夜, 達達又喺度嘈嘈閉!
呢隻豬不停扭計, 成晚鶯鶯聲咁, 還好唔係大聲吠; 之前遇到咁情況我會抱佢上床, 都無計嘛; 但如果今次又比佢扭嬴, 咁波波點算? 佢咁乖靜靜自己瞓床仔, 如果見達達上大床佢一定吠!
兩個都抱上床我咪原地踏步? 我做咁多嘢咪白費? 又訂床褥被鋪, 隔尿墊床圍, 貨都未番嚟我點可以功虧一簣?
一於唔理呢隻臭豬仔, 任得佢曳曳; 但都無可能再大覺瞓, 要留心住會唔會嘈到人, 仲驚波波比佢嘈到抆, 會打佢!
但波波真係好鍚達達, 佢行埋去挨近達達, 達豬嘈咗無幾耐就乖乖咁瞓喇!
達達依家好曳曳, 多多要求, 以前我哋晚飯時間, 佢會同波波入圍欄, 兩個自己玩; 自從老公每晚同佢坐埋一齊睇電視, 依家無論任何時間, 見到老公就扭計, 要坐梳化喇; 都係老公寵壞, 依家食飯都要夾開陪住隻臭豬仔, 攪到佢越嚟越曳!
但我哋都係犯賤, 見佢識扭計識暄巴嘈閉, 不但唔煩仲慶幸佢態度識轉彎, 以前嘅達達全無互動只係一隻靚靚嘅毛公仔咋!
希望達達情緒越嚟好, 就由得佢做刁蠻公主啦, 只要3隻豬仔開心, 我哋任怨任勞無所謂喇!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
