 |
| 相片連結 |
自從達達腰椎出事, 晚上瞓覺再無將佢同波波一齊困籠喇, 一來怕佢哋唔識就住個傷患又玩摔交, 二來兩隻豬條腰都有事, 就唔想佢哋好似以前咁黐住瞓覺, 想比佢哋有大D空間, 等佢哋可以伸直晒條腰啦!
本來我係先比達達上大床同我一齊瞓, 由得波波獨佔個籠就空間夠大, 達達上大床比較乖, 唔會郁嚟郁去會好好瞓覺; 但我呢個寶貝仔波波一向都妒忌心大, 見到達達同我一齊過夜又點得吖, 過咗一晚已經見佢唔開心嬲爆爆, 到夜晚仲唔肯入籠, 吠到嘈晒 :(
唯有換轉放達達入籠, 比波波上床瞓覺, 呢個係逼不得意嘅選擇, 波波唔同達達, 佢會不停換位好麻煩!
但更煩嘅係達達見波波上床, 佢又唔肯自己一個留喺籠喇, 成晚嘈喧巴閉我怕嘈住人家啦!
真係唔應該開呢條先例, 依家真係難攪; 結果又抱埋達達一齊上去, 從此我再無正式好好瞓過覺:(
波波會郁嚟郁去兩頭行, 一時係我頭一時又喺脚, 我左避右避又驚整親達達, 自己每次轉身都會醒晒, 更慘係仲要驚埋老公踢到兩隻豬嘛!
一晚醒嘅時間比瞓嘅時間長, 半年嚟真係好慘, 長此落去我會散晒㗎!
決定要諗個解決辦法, 開始要搵個大籠先得喇!
原來要搵一個合適size嘅籠真係好難, 求得長同濶度合適但高度又唔啱, 點辦?
我一向都係夜間先將個籠放出嚟比佢哋瞓覺, 日間唔會困籠, 所以會將個籠放咗入櫃, 咁就多D活動空間, 呎吋唔啱放唔落櫃就真係麻煩!
A問客廳有大圍欄, 可以比佢哋出去瞓嘛; 佢唔記得無耐之前先剛笑我, 話我嘅分離焦慮症好似嚴重過3隻豬仔, 出一出街都掛到心都離埋 :)
講真佢哋唔喺我視線範圍我又點會放心, 要我瞓得著更加難啦, 而佢哋見唔到我都一定唔肯瞓嘛; 仲有最大問題係佢哋要入房同我一齊歎冷氣, 分開係無可能啦:)
唯有再用圍欄, 個呎吋較適合, 但要佈置得舒舒服服都要時間; 唔想佢哋瞓得咁貼地下先要訂做床板, 跟住仲要諗床褥床圍同被鋪, 想做到十全十美都幾難㗎!
有朋友話我養狗養到好變態, 從來呢D都係觀點與角度問題, 我能力做得到當然希望比到佢哋最好啦, 係我選擇佢哋跟我生活, 佢哋無得楝嘛!
多謝Mi幫我買呢D床上用品, 呢D就係有養狗朋友嘅分別, 佢唔會覺得奇怪; 剛同佢傾咗一陣, 講及又有棄養狗狗, 我哋就唯恐鍚得唔夠, 點解有人會咁狠心?
唔鍚, 唔寵就唔好養, 咁就一定無麻煩; 每日見到咁多被棄養嘅毛小孩真係心實; 唔可以照顧佢哋一生一世, 就高抬貴手, 唔好將一時嘅開心建立落佢哋無盡嘅痛苦身上, 佢哋都有感情感覺, 棄養 - 好多時佢哋係無回頭路走, 再無路行!
想想朝夕相伴嘅家人, 被棄養後可能有非常悲慘嘅命運, 佢哋會諗點解再見唔到主人, 你哋真係咁硬心腸, 完全唔會傷心??
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
