 |
| 相片連結 |
琴日真係超充實嘅一日, 真係馬不停蹄咁做, 手腳都無停過!
朝早餵完3隻豬食早餐, 無得再瞓喇, 端午節又到, 要為3隻豬仔包粽, 雖然係包幾隻迷你粽, 但程序都一樣要做到足, 要浸粽葉, 切肉等等, 都要D時間去做!
 |
| 牛肉南瓜杞子小米粽 |
正當我整緊D粽葉, 接到Mi嘅訊息, 佢話3隻豬嘅床褥被鋪到晒佢公司喇, 不過佢要先拎番屋企, 星期一先車過嚟比我啊!
一聽就覺得唔妥啦, 要佢咁麻煩, 一個人拎嚟拎去點好意思啊, 況且佢工作地點同屋企路程相距遙遠, 咁做費時失事啦; 而且我心急病又發作喇, 明知到咗, 仲要等多幾日, 點瞓得著覺呀 :p
 |
| 張珊瑚絨被質地好靚, 仲有松松圖案, 我好鍾意啊！ |
我提議自己過銅鑼灣, 麻煩佢拎一拎落地鐵站, 佢話都有好幾袋, 床褥又大, 我一袋二袋咁拎都好論盡㗎; 無所謂啦, 就等我搖身一變做個水貨客!
嘩! 原來都幾多嘢㗎, 出閘入閘嗰時都幾狼狽啦; 仲要用最快速度跑返屋企, 又夠鐘餵3隻豬午餐喇!
餵完D豬仔佢哋乖乖瞓覺, 我即刻拆袋開機洗衫, D床鋪被仔用滴露洗過先敢比佢哋用嘛, 張床褥就開steamer高溫消毒, 應該聽日可以用喇!
好鍾意嗰張隔尿床笠, 好結實質地好靚, 但唔係膠嚟, 好似幾好咁!
跟住要開始包粽, 要拾熟都要好耐時間, 仲要影番D過節相嘛!
影完相快d比佢哋食喇, 忍咗咁耐影相都已經好乖!
今年係提早咗比佢哋過節, 正日要帶波波去睇眼科, 佢成日眼矇矇我好擔心啦, 雖然Dr.H話無問題, 但唔睇過專科我都係有D唔安樂, 都係check清楚好D喇!
 |
| 食得好醜怪, 哈哈哈! |
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
