呢3隻豬每日都有新鮮事, 總之就要將我嚇死啦!
每晚臨瞓前例牌餵佢哋黑酵毋, 用針筒泵落佢哋口仔, 年幾以嚟都係咁餵; 今晚餵完波波, 佢猛用手撥個口仔, 條脷又急速轉動, 總之動作好不尋常; 但我只係餵黑酵毋, 係啫喱狀物體, 無可能咁都出問題, 見佢條脷伸出伸入咁不安, 就令我好恐慌啦!
仔呀仔, 好端端又攪咩鬼呀?
呢個動作都維持咗好耐, 其間我試用針筒餵水, 但好似幫唔到佢 :(
諗起剛移民嘅姐姐狗狗有個咁嘅意外, 佢話狗狗食完晚餐, 又係咁用手猛撥嘴, 仲跑來跑去; 見到狗狗伸脷又用口磨地好不安, 佢好驚; 佢剛移民又唔知邊度去搵獸醫, 查電話簿又唔識嗰D文字, 佢好徬徨, 幾經辛苦終於有人幫忙搵到獸醫喇!
先照X RAY, 確認食道無嘢卡住, 但狗狗極度唔舒服, 一定係有問題; 獸醫用鎮靜劑令狗狗鬆弛, 然後檢查口腔有無事, 終於, 發現脷底有粒狗糧, 狗狗整唔出去, 一粒狗糧攪到咁大件事!
所以見波波用手猛撥, 我都即刻泵水落佢口仔, 希望有嘢會沖到出嚟 ; 講真佢無食過固體, 呢個情況機會好低!
望住佢不安咁兩頭行, 伸出伸入條脷, 又用手猛撥我真係好驚, 唔通咁都要夜嗎嗎急診搵獸醫?
呢個動作間歇性停一停又再開始, 究竟係乜事?
老公話會唔會有毛毛卡住, 喺脷根整唔出嚟, 又吞唔落去, 用水唔得試吓比粒零食, 睇睇帶唔帶到佢吞落去啦; 終於食咗3粒小食, 佢再無猛郁脷仔, 亦無兩頭走可以瞓低喇!
呢個只係我哋嘅估計, 仲要觀察吓聽日瞓醒有無問題, 係我過份緊張? 但性格係咁我都無計!
希望真係我緊張啦, 瞓醒要無事喇!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
