 |
| 相片連結 |
波波達達上床同我一齊, 夜間我真係瞓唔到覺, 積極D諗解決辦法, 希望對大家都好啦!
決定用圍欄, 希望佢哋有大D空間, 唔好再黐咁埋, 要好好保養條腰仔喇; 而我, 都可以瞓番個好覺!
坐言起行唔等喇, 請Mi幫忙訂購被鋪床褥, 自己就訂做地台, 盛高D唔想佢哋瞓貼近地下, 開咗冷氣地磚好凍嘛, 都濕氣重啦, 怕咗佢哋老D有風濕呀!
都係盡量做好D啦, 都明白做咗唔等如無事, 但希望可以將個機率降低吓!
琴日拎咗個地台喇, 有兩吋高, 如果加上床褥離地都有4吋, 咁OK喇; 雖然床褥被鋪未到手, 但我咁心急點會唔試吓, 拎D舊被鋪同床墊鋪晒落去, 頂住先啦!
有半年兩隻豬無困住一齊瞓, 有D擔心會唔鍾意啦, 琴晚放佢哋落去又似乎OK, 好似幾鍾意咁, 要睇吓半夜達達會唔會又嘈住要上床喇!
夜間又開咗冷氣, 我會遮一遮個圍欄, 唔想D冷氣直射住兩隻豬, 亦等佢哋有D安全感啦, 有上蓋好D嘛; 波波鍾意瞓住一堆被嘅, 我隨意放幾張氈落去啦!
真係好, 琴晚平安過渡, 兩隻豬瞓得好好呀!
我半夜起身偷偷望過, 原來夜晚兩隻豬都係同以前一樣, 黐住瞓㗎, 不過空間咁大, 可以隨時換位啦; 呢幾日唔會收起個圍欄, 等佢哋習慣習慣!
豆b當然再困籠啦, 一早就開始同佢做物理治療, 先做場效應, 跟住照燈, 艾炙, 每日勤力咁做, 希望幫到就唔使食藥啦!
困籠後係有改進, 步姿正常番, 再休息多D唔好出嚟玩住喇!
 |
| 同豆b做艾炙, 碌埋氣管穴位, 不過呢隻豬好唔合作呀 :( |
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
