 |
| 拎住個籌睇住個MON到未呀！ |
今日帶豆b去太平道診所覆診, 其實佢都差不多好番晒, 見佢呢幾日行動敏捷, 從個籠去圍欄跑得超快啦; 但確保自己唔會判斷錯誤, 都係帶去比醫生做個評估較安心喇!
準時到達診所, 等咗一陣, 就見醫生!
醫生叫豆b落地行吓, 可能隻豬驚啦, 行得好慢; 我話喺屋企唔係咁㗎!
 |
| 豆b好緊張, 本能反應都係驚咗診所呢D地方啦 |
醫生話無緊要啦, 都睇到佢行得有力番, 跟住抱番上檯再全身按壓, 再check吓手腳反彈, 話肌肉無繃緊放鬆晒, 同上次分別好大!
可以續步放監, 唔跳唔快跑應該ok喇; 開咗一星期藥備用, 如果再復發又未book到時間見醫生, 就食藥頂住先啦!
波波有痛, 有尖叫仲成身震晒, 無胃口唔肯食餐, 成日好驚咁縮埋, 但無影響佢行路, 手脚活動係正常狀態!
佢睇醫生照咗 x-ray, 除咗見到腰椎有幾節黐得較埋, 仲見到有骨刺; 不過佢行動無異狀, 問題唔算太大, 只食咗3日止痛藥就完全好番晒!
達達情況最奇怪, 椎間盤突出呢類問題一般都會痛啦, 但佢完全無痛嘅徵狀, 發覺佢有問題係見到佢下盤無力搖擺, 仲要無休止脚震, 行得好怪!
先睇專科評估為脊椎神經問題, 影響反射神經遲緩; 開咗幫助血液循環藥, 仲有Vit B修護神經, 但就無須止痛藥喇!
之後用針灸, 艾炙, 場效應治療, 再後來用埋順勢療法, 算係keep住穩定無更差, 但從未比過我感覺係有好番晒!
豆b有尖叫, 即係有痛啦, 但佢有胃口亦無震㗎; 見到佢條頸突然梗晒頭側側, 前手無力, 行得有D搖擺, 都知又係椎間盤問題喇!
睇專科開止痛藥, 放鬆肌肉同消炎, 2星期感覺係正常番!
3隻豬當中, 對twins都叫做有"好番", 起碼同病發前分別唔大; 雖然痛係好慘, 但對症下藥都可以控制住嘛!
但達達....雖然係無痛, 但就最麻煩, 佢去唔番病發前嘅狀態 :(
仲一直都有脚震, 只係較前好D啦; 行得都係差, 感覺係無力, 我最擔心係佢喇！
波波同達達打瘋狗針後, 個腫塊仍然唔散我有D擔心, V話目前只可以幫佢哋進行排毒, 按摩, 同加D 維他命C強化免疫力!
Mi就幫我sent email 問順勢醫生我可以點做, 佢哋好快比咗答覆啊!
"Use the rabies detox for any reaction along with the AN 16 Drawing out The vaccine will not affect the homeopathic effectiveness. Please contact us if you have any further enquiries."
主力都係排毒, 我會跟住去做, 咁又暫時停做場效應治療, 只集中照紅外線燈先啦!
今日同豆b睇醫生時我都順帶問吓, 醫生話觀察住如果腫塊無大就比D時修復啦; 醫生好好人, 好多時非關病情仲要唔同病者, 同我又唔熟, 佢哋唔會答㗎!
既然太平道郭醫生同Dr. H意見一致, 咁我耐心D等等啦!
多謝V同Mi嘅幫忙同比我advice, 有你哋同我商商量量我就較放鬆喇 :)
呢3隻豬真係好多事, 我要好好整理記錄, 同佢哋做番個Medical File日後可以覆查吓!
多謝大家一直支持這個小天地,
不過本blog的內容及照片,
不希望在其他媒體上轉載,
多謝留意及支持！
聲明 **我喺呢個BLOG所提及嘅所有補充品同有關嘅醫療器材,用品,方法等, 並無收取任何廣告費用, 無任何得益。我唔係獸醫，只係一個同幾隻狗狗共同生活嘅普通人, 原意只想分享我用過嘅產品, 經驗，我養狗狗嘅心路歷程。 望比各主人作個參考咁, 不承擔任何責任。醫療上嘅問題, 請徵詢醫生!
但大家要明白,保健品嘅療效及保健用嘅方法, 對每個身體並唔一定有相同反應, 大家喺選擇嘅時候，自己要做多D資料搜集, 因為你先最瞭解你寶貝嘅身體; 最好先咨詢醫生, 確定對狗狗原有服用嘅藥物有無干擾, 千萬唔好盲目相信效用.
希望大家以安全為大前提下，為自己嘅狗狗選擇合適嘅保健品同保健方法。**
大家要小心, 所有保健品都有機會導致個別狗狗有敏感㗎！
