偶然睇吓日曆, 驚覺今日已經係6月12日喇, 我係唔係病懵咗呀, 竟然忘記咗6月7日, 係寶貝仔叻叻嘅忌辰; 佢離開咗我, 足足有6年喇!
轉眼就六年, 坐低細想, 回味住同佢相處嘅每一個生活片段, 忽然一下子，重現眼前, 諗起初初接佢番嚟, 就好似只係上星期發生嘅事一樣，感覺好近... 但捉不到，留不住......
我越去細想, 越心有慼慼然! 作為佢嘅媽媽，只能默默承受... 過多嘅眼淚，只會令佢走得不安...
曾經睇過一段文字, 我將佢改咗少少, 配合住我此刻對佢深切嘅思念!
叻叻乖, 你陪伴咗媽媽 10 年, 帶俾媽媽好多快樂嘅回憶, 媽媽會永遠思念你... 同你走過嘅每一步, 每一跳, 都深印係媽媽嘅腦海, 永誌難忘。
叻叻乖, 正如媽媽承諾過, 生老病死, 不離不棄, 幾難都一齊行到最後, 媽媽都一步一步, 做到了。係彩虹橋嘅那邊, 會再無苦難, 有嘅係青山綠水, 同伴眾多, 你要好好安息。
叻叻乖, 要帶住媽媽嘅愛與思念上路, 與同伴互相照應, 展開新嘅旅程。媽媽會祝福你, 多謝你與我相依相伴 10 年...
