原來樂樂無離開過...(樂樂篇)

今日係樂樂嘅忌辰, 轉眼又一年喇, 上網睇到有寵物安樂園嘅工作講，動物嘅靈魂會停留喺骨灰上3年，3年後就會離去，唔知係唔係真嘅呢? 如果真係咁樣, 樂樂你無離開過我哋,  仲一直喺屋企陪住媽媽 :)

樂樂曾經係一隻開心嘅小狗, 只要我哋坐低喺地下, 佢就會奮力咁爬上我哋身上; 曾幾何時樂樂係咁黏人嘅小寶貝, 可惜後來會變到咁極端, 咁難親近.....

我唔要再回想佢嘅後半生喇, 嗰段回憶我要鎖起佢, 唔想比佢再喺腦海中停留! 

我要記番見樂樂嘅第一次, 嗰日同breeder會面, 原先係想要隻bb, 點知見到小樂樂, 佢就係咁奮力爬上阿女身上, 嗰時佢十個月大喇, 我從無諗過會養隻成犬, 所以只同佢玩咗一陣; 點知番到屋企, 會咁想念呢對小寶貝, 樂樂同叻叻....

如果唔係breeder要移民, 話唔帶佢走, 點會機緣巧合咁跟咗我哋番嚟, 仲要一帶3隻咁勇敢, 如果唔係有天大嘅緣份, 我都唔知答案要往何處尋!

同佢哋相處嗰一段開心, 熱鬧嘅日子, 每一個美麗片段, 我要好好牢記於心!

多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！