帶樂樂回家 (樂樂篇)

今日, 係另一個難忘嘅日子!
喺約定嘅時間, 我哋提早到咗寵物善終公司. 一如以往, 佢哋會將狗狗放喺一個藤籃, 帶到悼念室, 比我哋再聚片刻.
此後, 我哋就永遠再唔會見到樂樂喇!

好寧靜嘅悼念室                                       工作人員帶樂樂比我哋同佢道別 :'(

呢次已經係我第四次用同一間善終公司, 佢哋嘅服務我係頗滿意嘅, 每次佢地都將我離世嘅狗狗打理得好乾淨, 比我難受嘅感覺略為消減, 見到樂樂女安詳寧靜, 好似熟睡一樣, 心裏面稍感安慰!

我用手輕輕撫摸佢已經冰冷嘅身體, 佢嘅毛髮一如以往咁柔軟!

我同佢講, 爸爸為佢做咗一個彩虹球, 希望佢以後都可以開開心心, 自由奔放咁再跑住去追波喇! 

而且又可以見番叻叻, 仲有精精同安安, 就好似當日我帶佢哋番嚟一樣, 四個又再喺番埋一齊, 今後都不愁寂寞啦!



半小時好似一眨眼就過去, 終於到咗我最唔想面對嘅時刻!
我哋跟隨住工作人員, 帶住樂樂過去火化房!

佢哋將樂樂移去一個鐵盆, 叫我哋同佢講再見! 我將帶去嘅小食等, 放喺佢身邊, 仲有 - 彩虹球!

親眼望住樂樂入爐, 門一關上, 眼淚就失控狂湧出嚟, 然後我親手按掣! 
佢哋開咗一扇小窗, 比我望向那熊熊烈火....

兩小時後, 親手接住樂樂, 一齊番屋企!
我將佢同叻叻放喺一齊, 而安安就陪伴精精! 就好似好多年前佢哋自動分為兩組!

再見喇! 我嘅四寶,  仲有BeBe! 我會永遠懷念你哋!!

 

多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！