虛弱嘅樂樂 (樂樂篇)

年輕時嬌俏嘅樂樂

今日抱起樂樂同佢清潔嘅時候, 發覺佢好輕!  佢依家已經食少咗好多, 由乾糧轉咗乾糧+罐頭, 再由淨罐頭轉食嬰兒菜, 佢胃口明顯轉壞, 但還好仍肯堅持進食. 

離開, 對佢嚟講雖然算係一個解脫, 但我唔想佢會係餓死, 咁太可憐喇, 所以我都堅持住每小時餵佢一茶匙嬰兒菜 !

隨住佢身體嘅重量緩緩下降, 我感覺到佢嘅生命都快將慢慢走到盡頭!

我突然諗番起好耐以前,  抱佢番嚟果時, 抱上手嘅佢又係好似全無重量! 好清楚記得果時佢只有1磅12安士, 被獸醫斥責唔識照顧, 引至佢營養不良! 

我同自己講, 佢依家嚟咗我度, 今後我一定養到佢肥肥白白, 健健康康! (不過, 我係養到佢肥肥白白, 但咁並唔健康呀, 到頭來又要同佢減肥, 真失敗!)

腦裏面一幕幕從前嘅畫面, 有過咗去嘅事, 有佢同期已過世嘅狗狗, 仲有依家已離開咗嘅人, 都一一出現喺面前; 原來, 時間已經過咗咁耐, 好多嘢都有咗好大嘅改變!

今日, 我又再摸住佢輕輕同佢講, 唔好再撐喇, 快D去搵叻叻, 佢已經等咗你好耐,  而你都掛住叻叻咁多年! 去到另一國度, 有一大遍草原, 你又可以好似從前一樣, 追逐住你最鍾意玩嘅波波喇!
同佢一路講住, 自己竟然一路流住眼淚; 究竟我係咪已經準備好, 去接受佢將要離開

已介高齡仍然好靚嘅樂樂！

多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！