5寶軼事



生活喺彩虹橋上嘅４隻寶貝！

如果唔係朋友A提起佢以前嘅yahoo blog, 我都唔記得咗, 原來我都有一個!

不過都係多年前嘅事, 嗰時係剛剛精精去世, 我寫咗3篇文章咁大把:) , 用嚟抒發一下有D失落嘅情懷!

今日searched番, copied埋落嚟呢度, 睇番都頗有感受, 嗰時安安同樂樂都未走!

都係自己寫嘅嘢, 為咗整理方便D, 都係grouped埋一齊啦！

***************************************************************************　

部落格 (yeungpam)

精精走了 2009.10.27

我嘅狗女女精精走了…

真係好突然, 之前佢都重有胃口食嘢, 同平時無分別~~

走前一日胃口就差咗, 但我一啖啖餵佢, 佢都食咗少少,

點知今日一早起身就發覺佢無咗呼吸!

雖然近年佢都係食飽就瞓, 已經不再活躍,

雖然呢幾年佢心臟唔好, 一路都要食住心臟藥,

雖然我一直都有心理準備, 呢一日始終會嚟!

但係要面對佢從此就離開我, 今後我再唔可以見到佢, 我仍然係好難過….

佢仲有三個月就15歲喇, 但在佢嘅生命裏面, 呢一日竟然變得咁遙不可及!

呢兩日真係好特別, 所有狗狗都好靜, 屋企嘅氣氛同平時好唔同,我稔佢哋都感覺到精精要離開大家喇!!

已經同佢做完火化, 亦帶咗佢返屋企.

希望精精去到彩虹橋會搵到叻叻, 兩姐弟會相親相愛,

開開心心咁生活落去!!

懷念我三隻已離開嘅寶貝!  2009.10.31

還記得我第一隻狗狗BeBe, 到佢病情轉壞時,
一躺下便會劇烈地喘氣!

那時我同家人每日都接力抱佢,等佢唔駛平躺,

獸醫建議比佢安樂死, 我哋都唔想佢咁辛苦,

於是我哋為佢準備好一張靚床仔, 一家人帶住佢,
預備帶佢去獸醫處, 同佢說再見!
那天抱住佢, 由屋企落到大門口, 大家都喊咗出嚟,

我哋都係捨不得, 親手送走佢, 跟住就番轉頭抱佢番屋企.
就係咁24小時接力照顧佢,

到佢嚥下最後一口氣, 我哋都喺佢身邊!

到第二隻狗狗叻叻, 佢係一隻多病嘅狗狗, 先有甲狀腺, 抽筋, 到後來既心臟病,肺積水, 腎衰竭!

忘不了有幾多次佢病發, 半夜抱住佢去求醫, 遇到無良醫生, 一味斂財,個中辛酸仍難忘記!

獸醫判佢死刑我仍唔肯放手, 抱佢去睇中醫, 苦茶一點點咁餵,

但最後佢都係離開我, 唯一安慰嘅係佢走嘅時候,我係抱住佢!!

相對精精, 其實能夠喺睡夢中安靜咁離去, 都係一種福氣,
精精一向都係一隻安靜嘅小狗, 佢走都走得好安靜!
我只係難過佢走嘅時侯我無陪住佢, 讓佢孤身上路,
呢個係我無法填補嘅遺憾, 我對佢係有虧欠, 係愛得不夠!
希望精精唔會怪我, 喺彩虹橋開始佢愉快嘅新生活,
今生有不足嘅, 而家都能夠擁有!

轉眼一週了!!  2009.11.03 

一轉眼精精走咗一週了!!

喺呢個星期裏面, 心情真係好複雜, 起起跌跌想咗好多!

呢幾年來, 年老嘅不再活躍, 好多時都係瞓覺,
我亦唔想攪佢哋, 除咗基本嘅護理外, 真係少咗抱佢哋!

由其是波波同達達返咗嚟, 確實分薄咗對佢哋嘅關注,
雖然我盡量做到老嘅為首, 所有嘢都平等,
我煮嘅,或買返嚟嘅食物, 我從來無偏心(不過又唔係好事, 安安食完月餅腸胃炎, 又痾又嘔, 睇咗兩次醫生)
呢幾日嘗試同兩隻老豬仔溝通多D, 抱佢哋多D, 佢哋又好似唔多領情, 嫌我煩咁, 係都要蜷返落床仔瞓.

我諗唔同年紀有唔同需要, 勉強攪住佢哋唔代表愛佢哋,
都係順其自然, 配合佢哋嘅需要仲好.

諗通咗喇, 之前覺得對精精有虧欠,
但其實我只係順住佢嘅生活方式去做,
即使而家, 我都會一樣, 佢哋都係我嘅仔女,
我都一樣咁愛佢哋既!

朋友介紹咗我睇一本書, "動物生死書"

佢話睇完會開智慧, 作者係獸醫, 亦係佛教徒,

等我心靜下來慢慢睇, 希望有所領悟!

4寶



生活喺彩虹橋上嘅5隻寶貝！

多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！