悼bebe (BeBe篇)

一個人嘅心要有幾廣闊, 先可以裝載到咁多悲歡離合?

八月 - bebe同樂樂都選擇咗呢個月份離開!!

生離感傷, 死別錐心, 從過去到依家, 每發生一次就重傷一
次; 從來唔可以睇得開, 睇得化, 只可以將嗰種痛沉澱落嚟, 唔去想, 唔觸碰.....

多年前嘅今日, 係bebe離開我哋嘅日子, 雖然好多記憶都飄到好遙遠, 但有部份記憶又好似近在眼前!

4個月大嘅bebe

第一次見bebe係帶住阿女去寵物店, 嗰時我連呢個狗狗係咩品種都未識, 老板娘放咗3隻狗狗出嚟比我哋挑選; 就係呢隻狗狗成日繞住阿女團團咁轉圈, 係佢揀選要同我哋一齊生活, 好似唔比我哋有選擇權!
諗起呢個甜蜜嘅片段, 不自覺帶住微笑….

又記起最後同佢相處嗰個早晨, 都知道佢再撐唔落去喇, 醫生都話咗再幫唔到佢, 要嚟嘅始終要嚟!

嗰朝早晨, 佢呼吸變得沉重,我同阿女就知呢一日終於都嚟; 我哋陪住喺佢身邊, 一路叫佢要勇敢, 媽媽同姐姐都陪住佢, 唔好驚放心向前行; 睇住佢呼出最後嘅一口氣, 阿女用雙手將佢攬住,  睇住佢呼吸由急促起伏, 一直到靜止落嚟……

已經年老嘅bebe

我哋嘅眼淚好似缺堤咁湧晒出嚟, 佢一直係我哋家中嘅一份子, 亦係我哋養嘅第一隻松松bb……
仲記得bebe走後嗰一段日子, 屋企好靜, 但仍然好清楚聽到bebe頸上嘅鈴聲!!!

bebe佔阿女生命中好重要嘅一部份，陪伴住佢過渡童年到少年！

從嗰時開始, 我哋決定如果今後要再養狗狗, 再唔會掛上搖鈴, 果種聲音實在環繞住我哋好耐, 係一種好大嘅折磨!

一轉眼就過咗咁多年, bebe - 你安好嗎?

 
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！