送別樂樂 - 樂樂篇 (w/album)

Dec 10, 1995 - Aug 25, 2011
相片連結

樂樂走咗喇! 於2011年8月25日, 中午12點52分!
今早6點開始, 我就將佢放喺我身邊, 我知道今次唔會等好耐喇!

我同佢講, 叫佢唔駛驚, 媽媽喺度陪住佢, 快D瞓覺啦, 瞓醒就會見到叻叻架喇!

我睇住佢呼吸續漸急速, 然後 - 睇住佢嚥下最後一口氣!

從此, 佢唔駛再受苦喇!!

多日來, 我見佢越食越少, 已經心裏有數; 佢已經唔可以再控制自己嘅大、 小便, 甚至會不自覺咁流出氣味難聞嘅口水, 所以, 我要不停咁同佢清潔, 而工人姐姐就負責密密咁同佢洗換床鋪!


為咗佢肯食多少少,  我不停咁轉換口味, 將食物磨到好碎; 然後, 去到要加水落嬰兒菜, 用針筒餵佢; 到咗最後, 佢唔肯再吞!

我其實好矛盾, 一方面唔想佢咁樣奄奄一色拖落去, 但我更加唔忍心睇住佢唔飲唔食就咁瞓喺度等時間到, 叫我帶佢去醫生度打一針, 我更家做唔到!

每日我都同佢講, 唔好唔捨得, 我哋總會再見, 叫佢去搵叻叻, 開開心心咁過生活先啦, 咁樣拖住媽媽見到心痛, 自己又辛苦!

我見到佢望住我, 個口喺度打震, 好似想講嘢, 定還是係佢覺得凍?

本來咁嘅氣溫我一直都有比塊涼墊佢, 但突然醒覺到依家佢嘅體溫應該會降低, 急忙拎開張涼墊, 加添張大毛巾比佢, 我都係大意咗!!

2009年10月,精精走咗!

2010年9月, 安安走咗!

今年2011年8月, 樂樂都走咗喇!

連續3年, 不足一年我就送別我一隻狗狗!

呢件唔係一件輕鬆嘅事, 雖然大早就知道, 養一群同齡嘅狗狗, 就會有咁嘅一日, 甚至有可能佢哋會同年離開!

每次感覺都一樣, 當善終公司人員嚟到, 要我親手將佢交喺他人嘅手, 個心就好痛好痛!

生離死別從來都難以從容面對, 畢竟十幾年裏面, 佢從來未離開過我!

今日, 睇住佢被放入個箱仔, 蓋上白毛巾, 然後, 就被帶走, 我就再忍唔住自己嘅眼淚!


今日, 佢終於要走喇…..
佢嘅sweet sixteen仲有三個幾月就到….|

多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！

2012年4月, 親手做咗紀念樂樂嘅羊毛氈公仔, 仲有佢最愛玩嘅彩虹球!