今日有一個新發現, 我發覺達達嘅毛色有好嘅改變!
佢頭同前手嘅毛毛開始變黃, 但背脊都係無改善, 相信背部遺留落嚟短短嘅旱毛, 係唔會死灰復燃喇, 希望褪晒D死毛後, 會換上有生命嘅新毛啦!
其實早幾日前, 我都有呢個感覺, 不過唔太肯定, 我怕係我自以為是, 期望+幻想, 到頭來空歡喜一場!
今日同達達搽Emu Oil, 慢慢按摩嘅時候, 自然又集中注意力喺佢度啦, 今次覺得唔係自己一廂情願, 睇到改變真係好明顯!
達達毛毛褪色已經好耐喇, 睇住佢黃色嘅毛毛慢慢變淺, 不過同甩毛比較, 我當然著重於生毛先啦; 所以毛色我無特別希望有改善, 只希望佢唔好係隻光豬仔就算!
開始咗Emu Oil同薑黃素喇, 生毛方面仍係未有改善, 當然無可能一步登天啦, 唔可以太心急嘅; 但增加毛色都係一個好預兆嘛, 究竟係乜嘢令佢毛色改變呢? 應該唔會係呢兩樣喇!
雖然都增加咗褪黑激素同甲狀腺藥嘅份量, 但對毛色應該無關係卦, 咁新加入嘅補充品就只有神奇粉同補肝湯啦, 我會相信係神奇粉嘅效力較大, 因為達達食咗快一個月喇, 而補肝湯唔係日日飲, 應該都係輔助性質, 不過呢兩樣主力都係人參, 咁可能達達對人參反應較接受!
有改進始終係件好事, 即使未見生毛, 仍然比咗我好大鼓舞,呢個小小嘅改善好似幫我打咗枝強心針 :)
急忙影番張相想同大家分享, 不過相片又表達唔到嗰個分別, 希望以後我會有更多正面嘅消息同大家報告啦!
 |
| 呢幾個位置最明顯 |
 |
| 除咗頭頂，前手都有深色少少！ |
 |
| 整個頭頂都深色咗！ |
 |
| 圍住耳仔附近最明顯 |
