 |
| 成日都向左走向右走, 咁難攪架! 相片連結 |
今日係平安夜, 係萬衆歡騰嘅日子, 但我心裏面好唔安樂, 有個影像好似揮之不去!
夲來唔想講, 唔想記住呢件事, 但總係忘記唔到嗰日嘅情形!
前日同達達豬去驗血, 喺診所等候其間, 都見到姑娘姐姐密密咁接電話, 回絶當日嘅booking; 突然大門一開, 入嚟嘅係一位男仕, 佢好愁咁問依家有無醫生睇!
姑娘姐姐答話一整日嘅booking都滿晒喇, 問佢係貓貓定狗狗想睇, 有乜嘢問題!
嗰位男仕話想帶貓貓嚟人道毀滅, 佢話貓貓年老喇, 口腔生有腫瘤, 而且肛門都流血; 琴晚喊咗一整夜, 佢好唔忍心; 應該貓貓好痛喇, 佢話諗咗好耐, 決定送佢一程!
喺咁情況下, 姑娘姐姐惘開一面,叫佢帶貓貓嚟睇睇!
原來呢位先生就住喺附近, 一轉眼間就見佢用毛巾包住貓貓抱入嚟; 隻貓貓不停咁叫, 我望到貓貓腫咗嘅一邊面, 佢應該係好痛喇; 呢位先生就溫柔咁叫佢唔使驚, 好快就會無事!
無耐佢抱貓貓入咗診症室, 又好快自己走番出嚟, 喺關上門嗰剎那, 我見到貓貓望住佢叫, 我聽見佢同貓貓道別, 我就眼都紅晒; 佢見我咁樣, 就坐係我隔離, 話醫生要同貓貓再檢查身體, 然後開始同我講佢同貓貓嘅一切!
一D好瑣碎嘅日常生活, 但喺咁環境講起嚟, 份外傷心!
佢話自己係一個單身漢, 養咗幾隻貓貓, 都係樓梯底執番嚟, 之前嗰隻養到23歲, 呢隻都養咗20年, 從BB咁細養起, 親手餵奶, 一路到佢哋長大!
佢話雖然自己唔富有, 但從無要佢哋挨餓, 雖然平日食貓糧, 但每星期都會買九棍魚蒸比佢哋, 平日佢會去摘D野草, 放喺屋企, 貓貓有唔舒服會自己去食, 仲教我點樣去揀草!
雖然我唔係養貓貓, 但我都耐心聽佢傾訴, 呢個時刻佢好需要支持!
我問佢點解唔陪住貓貓走最後呢程路, 佢話上一隻23歲貓貓腎衰竭都係人道, 佢到今日都忘記唔到貓貓嘅表情, 佢唔敢再睇! 依家屋企仲有一隻17歲, 養到佢百年歸老, 佢唔會再養貓貓!
跟住我就同達達入咗去睇醫生, 到我出番嚟, 佢同我講拜拜, 話已經送走咗貓貓; 我真係忍唔到眼淚, 真係好難過, 呢次係第一次親身感受到親手送別過程裡嘅痛苦, 真係唔容易; 希望貓貓一路好走, 喺彩虹橋生活愉快!
貓貓望向主人嗰個眼神, 我總係忘記唔到, 仲有佢嘅叫聲好低沉!
我又諗起叻叻喇, 當日醫生都叫我送佢走, 就係佢嘅眼神令我唔忍心; 呢個無疑係一個好主人, 勇敢咁幫貓貓解除痛苦, 但唔係每一個人都做得到!
平安夜, 願大家都平平安安, 身體健壯!
突然好掛住我5隻住喺彩虹橋上嘅寶貝; bebe, 安安樂樂, 精精叻叻, 聖誕快樂!
 |
| 彩虹橋上嘅5寶! |
天文台話今日好凍, 但見到外面好好陽光, 自己又好想出去行吓, 每逢有唔開心嘅事, 我都好似狗狗咁, 要出去跑吓舒壓; 今日爸爸放假, 咁就一齊出去跑一轉啦!
有幾日無出去, 3隻豬都比較緊張, 著住衫又無咁自然, 都係諗住喺街行一轉就算, 上平台放繩佢哋會行得較自然!
 |
| 其實最攰嗰個係我呀! |
路上遇到隻poodle, 波波又係撲同吠, 我快快拖開佢免麻煩,; 諗住拖走波波就ok啦, 點知隻貪玩poodle竟然去撩達達, 隻惡女梗係鬧鬼啦; 怕咗呢兩隻縱壞咗嘅豬仔喇, 都係上平台啦, 希望唔會有小朋友喺度玩啦!
好好彩平台無乜人, 可能怕凍卦, 可以放繩比幾隻豬自由咁跑, 跑到佢哋夠鐘食晚飯, 就番歸喇, 3隻豬食完飯瞓晒, 今日跑到好攰啦!
 |
| 係都要我陪跑, 跑到我傻晒 :( |
其實我最攰, 次次都一樣, 3隻豬好似黐身膏藥, 我唔跑佢哋又唔跑, 係咁黐實晒, 想佢哋多D運動量, 尤其係達達,喺屋企都唔肯點行, 唯有做領跑員, 係咁兩頭跑, 跑到我傻晒!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
