 |
| 相片連結：Christmas 2012(1) |
今日的起心肝, 同3隻豬仔出去影聖誕相, 諗住週日唔會太多人; 出門前都係餵咗花精比波波同達達, 希望佢哋可以好好控制到情緒, 唔好咁麻煩!
到咗影相地點, 都係人來人往, 仲有好多好多細路仔, 對住佢地扮鬼扮馬, 暄嘩鬼叫添:(
真係無晒辦法, 波波就失控咁吠, 好似同D細路鬥大聲, 通常呢種情況, 都係D工人姐姐帶住佢哋, D姐姐好少理; 又有細路衝埋嚟, 想攪佢哋, 我都要擋喺前面, 保護住3隻豬仔!
小朋友多數都係受軟唔受硬嘅, 我唯有好聲好氣咁同佢哋講, "唔該比我哋影張相, 佢哋唔係人仔, 無返學又無老師教, 所以無你哋咁乖", 一定要將環境控制好, 小朋友唔會兩頭咁衝, 波波先會唔嘈嘛; 真係出盡渾身解數, 氹完人仔又氹狗仔, 過完一關又一關!
我唔想做成滋擾, 話晒都係公眾地方, 唔想比人覺得養狗嘅人又自私又乞人憎啦!
當然除咗小朋友都有好多途人, 會圍埋嚟影埋一份, 對3隻豬都係一個好大嘅挑戰; 只要人家唔好向佢哋伸手, 係絕對無問題, 達達全程都好冷靜, 無怯懼嘅樣show出嚟, 都有人要求要摸吓佢, 佢都無往常咁尖叫躲避, 但全日都木無表情!
同佢哋影相已經唔容易, 仲要有咁多外來因素影嚮, 我完全無得諗角度問題; 只係用隻機械手係咁按快門, 亂咁按; 咁嘅環境有一個好處, 係佢哋完全唔覺我影緊相, 因為有太多誘惑吸引咗佢哋注意力啦!
我覺得花藥對達達係有一定影嚮, 對波波就毫無幫助, 每用一樣物品都講求夾同唔夾, 可能生長毛毛方面, 達達仍然未搵到夾佢嘅補充品, 又或者未服用到足夠時間啦; 我一定會堅持落去, 就當打持久戰啦!
之後兜落商場, 買咗D小食比佢哋, 咁就番歸; 今日好攰, 好似全身散晒:)
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
