表現各異(w/album)

佢哋嘅表情話我聽, 佢哋好悶喎!
相片連結

今日天氣唔錯, 仲有太陽, 係好適合同班豬仔出去行吓嘅, 之前幾日都落雨, 天氣咁差都無出去囉; 無奈我好鬼懶, 真係唔想出去行!
同佢哋鋪好個圍欄, 等佢哋自己入去玩, 暖暖咁係屋企坐吓, 好過落去行啦; 但3隻豬坐咗入圍欄, 又唔玩喎, 波波好似悶悶咁爬落床仔, 達達就兩頭行, 好似有太多精力需要發洩呀.

唉! 好啦, 為咗佢哋開心, 咁落去行啦!

果然出咗街, 佢哋好生猛, 波波第一個落地彈彈吓咁行; 兩隻女喺車入面嘈喧巴閉, 佢哋都好心急落地行!

生猛晒!

可能大家都一樣, 等咗好耐天氣咁爽, 今日遇到好多狗狗; 雖然我餵咗花藥比波波, 但都制止唔到佢見到狗狗時又跳又撲, 反而達達豬用咗花藥, 就勇氣可加; 今日有哥哥姐姐伸手去摸, 我有提醒佢哋動作要慢, 但達達反應ok喎, 無避開 :)
不過隻刁蠻女好鬼惡, 今日有隻約瑟仔好遠見到佢想衝埋嚟, 達達同波波嘅反應唔一樣, 佢向住狗狗大聲吠, 好似叫佢唔好行埋嚟, 隻約瑟仔都有D驚, 雙腳黐實個地, 但個身就趨前, 好得意!
拖住達達向前行, 佢表現唔錯, 除咗有一吓好嚮嘅剎車聲嚇到佢死!

跟住到豆b行, 又遇番隻約瑟仔, 豆b當然無激烈反應, 友善咁同佢打招呼啦; 但隻約瑟好似怕怕哋喇, 可能之前波波達達太惡死, 佢唔係好敢行埋嚟; 豆b氣定神閒無乜所謂, 自得其樂無再理佢!

3隻豬仔表現各異, 如果波波達達都可以好似豆b咁, 我就無咗好多煩惱, 仲可以帶佢哋去好多活動啦, 依家反而要搵啱時間去避開其他狗狗, 真係好麻煩 :(

多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！