我係一個好心急嘅人, 每個朋友comment都一致, 祇要我決定咗嘅事, 就要立刻去實行; 無論有幾困難, 要經過幾多挫折, 我都會咬緊牙根!
LaserComb已經訂咗, 諗住快D同達達試吓, 但最後都係擔心會唔會用咗更差, 因為店主同我講咗句狗同人皮膚有分別呀!
本來唔敢再煩H醫生, 上次都比佢話, 100個人有200個意見, 叫我唔好藥石亂投!
硬著頭皮都係要問一問, 佢答案話達達係”松果腺”有關嘅脫毛症, 用呢D方法唔啱, 佢話答唔到我用咗會唔會更差架, 用都唔見得有效!
每次我用一個新方法同達達試, 問佢都話用吓無妨, 未試過有咁嘅答案, 咁我唔敢用喇, 益老公啦, 等佢做吓預防:D
枉費咗G嘅一番好意介紹, 希望佢唔會介意啦！
唔肯放棄, 呢個係我性格上嘅優點, 同時亦係一個缺點, 會帶比自己好大壓力, 都影響到身邊嘅人!
我都知對達達今次甩毛呢件事, 我係太執著; 某程度上我覺得好似對叻叻做緊一個補償!
想當日叻叻甩毛去睇醫生, 話要同佢先做絕育, 但我唔肯!
我當時覺得好哋哋要佢捱一刀,係無必要, 因為呢個只係一個症狀唔係病, 我希望用藥物治療, 唔想做手術要麻醉有風險, 佢當時身體又唔好, 又食住抽筋藥添!
呢種症狀無案例跟,根本無從入手, 當時叻叻一直都只係followed佢抽筋同甲狀腺病, 希望調節好就會出番毛.
原來甩毛都引發好多問題, 首先佢行路好似有D失平衡, 無著衫更甚; 一定要著住衫仔, 佢先有番信心; 再落嚟係皮膚會變厚, 醫生同佢抽血好難落針!
無咗毛毛皮膚得兩個反應, 變厚好似叻叻咁; 變薄, 仲死! 容易磨損, 易受感染 :(
當發覺出問題, 到嗰時再想挽救都無用, 過咗咁耐毛囊無晒反應, 當時嗰個醫生又無咁open, 無試用唔入藥典嘅melatonin, 我嗰時又唔識上網, 陰差陽錯注定咗失敗:(
我後來有帶佢睇中醫食中藥, 係見到頭毛密咗D, 但個身就再無可能!
即係佢頭仔毛囊有反應, 但個身就遲咗去實行!
我唔知當日如果同佢做絕育對生毛有無幫助, 但點解我唔嘗試?
以前養狗狗, 會覺得絕育係逆天而行; 好好哋無病無痛點解要做手術, 要捱不必要嘅痛?
精精8歲有假懷孕, 佢嚟咗我度從無交配, 何來乳汁? 一check之下仲發覺乳房有3個腫瘤, 同一時間喺咁大年紀要做咁大手術, 要絕育又要割腫瘤:'(
驚起上嚟跟住check埋樂樂, 佢乳房都有一個腫瘤, 又係高齡絕育同割瘤, 還幸所有腫瘤都屬良性, 好好彩咁過咗呢個難關!
安安比較好彩, 要接3寶番嚟, 佢一定要先去做絕育; 我唔想佢哋意外咁製做小生命出嚟!
點解我唔怕叻叻有問題? 佢體型太細喇, 有咩事精精同樂樂都好容易走得甩!
如果當日我一早同佢哋做絕育, 精精同樂樂唔會經歷咁大手術; 如果我肯同叻叻做絕育, 佢毛毛可能長得番; 唔關健康問題, 但對佢情緒都有影響!
一個錯誤嘅concept, 令到佢哋身心受苦, 改寫咗佢哋嘅狗生！
吸取咗過去嘅教訓, 為咗健康問題, 豬仔們一定要做呢個手術!
不過好似又做錯, 又懷疑做咗手術改變咗達達嘅荷爾蒙, 導至佢甩毛:(其實我有問過醫生, 佢話可能唔大!
雖然一切都係猜想, 再諗都無用, 所以我今次唔想錯過任何機會, 會去嘗試一切方法, 去令達達毛囊復甦!
失敗! 氣餒! 再失敗! 尤其到咗樽頸位, 有時會意興蘭珊, 左搖右擺; 點解少少正面反應都無? 好多時會迷失方向想放棄, 幾時應該放手? 還是應該強求?
2012即將過去, 2013會帶比我好運? 達達有可能嗎?
