琴日收到一個壞消息, S話比我知煩煩走咗喇, 好突然! 煩煩應該未有8歲, 生命對佢嚟講實在太短暫!
煩煩唔係我熟識嘅狗狗, 印像裏面我只見過佢兩次! 但佢嘅離開我感覺好複雜, 因為佢係豆豆同波波嘅生母, 我用人類嘅感覺代入咗, 突然覺得對TWINS好可憐!
從來無聽過煩煩有病, 近來聽到嘅都係話佢曳曳, 通度尿尿; 所以聽到佢係心臟病突發, 我好愕然! 近來佢有個綽號"肥雞", 唔知係咪真係過肥出毛病, 而佢亂咁尿尿, 會唔會係佢有病嘅訊息? 不過依家再諗都係無補於事喇!
相信煩b唔會記得呢對仔女, 而我兩隻豬都唔會記得呢個媽媽, 上次佢哋見面完全好似陌路"人"
但即使係咁, 我都要同煩b你講句:
"煩b, 安心上路啦, 當你踏上彩虹橋上嘅嗰一刻開始,你會有一個多姿多彩嘅新生活, 你會被濃濃嘅愛所包圍, 嗰度無疾病, 無痛苦; 你呢對仔女就由我呢個媽媽代你好好愛錫, 你可以放心!"
一個生命, 有如一片羽毛, 就咁輕輕飄走, 完全係措手不及! 要珍惜身邊嘅人同狗狗, 有一日雖然要分手, 我哋可以傷心, 但唔可以有遺憾!
 |
| 三母子一齊影相, 竟然係得唯一嘅一次! |
 |
| 嗰日去影樓影相, 對twins全不在狀態, 唔靚! |
 |
| 仲以為再有機會, 再影過..... |
 |
| 永遠唔可以諗仲有時間..... |
 |
| 3母子一齊, 成為絕唱 :'( |
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
