 |
| 相片連結 |
近日天氣都唔穩定, 好難見到陽光, 成日都有雨; 春天應該係萬物生機萌發嘅時間, 係好嘅開始, 但天氣咁潮濕, 我就覺得好唔舒服喇!
今日星期日, 工人姐姐放假, 原本係休息日, 我唔會同3隻豬出街; 一個人帶3隻豬唔容易, 最主要係假日咁多小朋友同狗狗, 無謂比刺激波波豬啦, 但我想帶達達出去行多D, 一人一狗我可以照顧到架!
準備好一切正想出門, 接到舊工人姐姐電話, 佢話喺我屋企附近, 想嚟探吓3隻豬; 今次已經係佢第四次要求上嚟探佢哋喇,上幾次我唔係去咗整牙就係病, 無一次合時; 佢話佢真係好掛住3隻豬仔, 唔會阻我好耐, 見一見佢哋就OK喇; 我哋一向關係又唔係咁差, 依家佢唔係我工人, 我見唔到佢黑面就無所謂啦 :)
姐姐上到嚟由睡房到廚房都逐間去睇 ;) 佢話好miss呢度嘅一切! 佢突然走咗去廁所同佢哋換起尿片嚟, 佢話好miss為班豬仔做嘅呢一切一切! 跟住同我講佢依家工作環境有幾曳, 佢話廚房好細, 廚櫃無門, 樣樣都甩頭甩髻!
我同佢講盡量做好自己本份去幫忙啦, 世上一切無十全十美架, 認為唔好咪盡能力做到佢好囉, 作太多比較好無謂!
人永遠係身在福中不知福, 永遠都係失去嘅係最寶貴, 想當日佢喺我度, 咪又係同左鄰右理D姐姐講呢度令到佢好閉翳 :)
姐姐今次番嚟嘅一次對話, 令我更明白要珍惜目前嘅一切; 當你諗住自己有嘅唔係最好, 但失去後就知原來有更差嘅可能會嚟; 追求更好係常情, 但要求太苛就好無謂!
 |
| 後面隻狗狗想追上嚟 |
姐姐一坐就坐咗好耐, 仲好似以前咁幫手餵豬仔, 跟住仲要去洗碗, 一路做一路話好似佢已經又返番嚟 :)
到佢走嘅時候, 接近傍晚喇, 要趕快同達達豬出去, 天色太黑隻女會好驚青!
 |
| 達達好快就轉身走咗去 :) |
星期日嘅傍晚真係多狗狗, 好多狗狗行過嚟, 我由得達達自己選擇佢要唔要交朋友仔, 有時佢會停低, 但大部份時間佢都係擰轉身唔睇; 其他主人就話佢好細膽呀, 咁我就會問見到我綁上咗黃絲帶麻嗎? 然後又承機同佢哋講解起嚟 :)
可惜大部份人都話聞所未聞有呢個運動 :( 唔緊要啦, 今日知道都未遲, 以後見到黃絲帶狗狗, 請比佢哋適當空間! 同達達行街每次都聽到好多讚美, 又見到好多人都帶住笑容望向佢, 個心真係好舒服.
"好得意呀" "係咪bb" "佢幾大呀? 吓! 6歲?"
 |
呢D好似係例牌問題, 每次出去都答好多次, 如果達達豬唔係咁惡死, 一定更得人鍾意啦 :)
行咗45分鐘, 上平台影吓相, 返屋企達達好滿足, 好乖瞓覺覺豬 :)
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
