 |
| 好耐無咁樣一齊排排坐喇! 相片連結 |
天氣唔好, 行雷閃電又落雨, 當然無得出去啦; 濕度高, 3隻豬D毛毛好似黐立立, 一於同佢哋沖番過涼, 再開冷氣歎!
同3隻豬沖涼又用咗半日時間, 再修吓毛毛, 希望整齊少少啦!
每次同豆b修毛都係咁難, 佢永遠都係唔合作, 成條軟皮蛇咁,我無晒辦法; 我呢D三腳貓工夫真係唔夠佢玩, 激到我跳彈彈!
波波比豆b好少少啦, 佢都受讚, 話佢乖仔氹吓佢, 落剪都算唔係太難!
最最乖就真係達達, 唔好睇佢平日乜都怕, 同佢剪毛真係超合作, 叫佢企高坐低都無艱難; 所以剪得最齊整喇!
其實達達毛毛都未完全生得好, 前胸都仲好短, 唔知點解呢個位生得咁慢, 不過無所謂啦!
剪完毛毛等佢哋自己玩吓, 然後食晚飯, 波波心情無之前咁壞, 都同達達好friend喇, 之前佢連達達都蝦!
豆b同波波關係就好似越嚟越差喇, 我都知責任應該關乎隻衰豬仔, 佢心情唔好就邊個都怕; 達達比較錫波波, 就算波波橫蠻無理佢都就住, 唔會硬碰硬, 所以好快好番; 但豆b就唔同講法, 佢好自我保護, 一定反擊, 仲惡到CC吓, 咁情況真係難攪!
以前3隻豬都可以好和平咁坐低影吓相, 依家真係難, 唔係波波打豆b, 就係豆b兇達達, 反而呢隻惡女達達仲無咁麻煩, 自從佢生番毛毛, 心情靚到頂瓜瓜!
好似去多咗街街, 遇到多咗外來挑戰波波壓力仲大, 其實唔止波波, 每次出去我都瞄嚟瞄去有無放繩狗, 成日比放繩狗嚇, 完全唔係relaxed狀態; 大家都精神緊張, 互相影響, 有反效果啦; 攪到波波帶住負能量番嚟, 發洩喺兩隻女身上, 連豆b都緊張埋, 今次真係雞犬不寧喇, 暫時都係隔開外間嘅狗狗, 淨係上平台行好喇, 等過一段日子, 將呢D壞記憶洗去, 再作打算啦!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
