 |
| 相片連結 |
琴日係週末, 一直都無諗過要出去, 都預咗有太多人同狗狗; 但一連幾日都落雨, 咁難得見到有陽光, 唔捨得浪費呢個"良辰吉日", 一於同3隻豬出去, 希望午飯時間會少D人啦!
希望落空, 滿街都係人同狗狗, 即使想用番原有嘅方法, 見到前方有狗就轉身, 都係無可能; 前後左右都有人放狗狗, 我轉嚟轉去轉到頭都暈, 都擺脫唔到波波吠叫嘅命運!
無可奈何下轉番上平台, 等佢哋坐住車仔兜吓, 希望過一段時間, 街上會無咁多人啦; 上到平台, 依然無辦法扭轉命運, 四處都係小朋友, 仲要圍住架車仔猛叫狗狗, 狗狗 :(
睇住一大班天真漫爛嘅面孔, 仲有滿面笑容嘅媽媽, 大家喺度七嘴八舌咁叫波波聽話, 本來波波咁吠我應該調頭而去, 但又唔想拒人千里咁乞人憎; 波波邊有咁順得人吖, 但見大家都咁鍾意3隻豬仔, 我比親善大使豆豆出馬!
叫姐姐推波波達達行開, 唔想令波波增添壓力, 平台上唔會有放繩狗, 無馬路又無車, 我比較放心, 叫佢唔可以離開我視線範圍兩頭遊吓!
豆b唔怕小朋友, 我放佢落地, 小朋友好開心; 呢班係較細嘅BB, 大都係媽媽抱喺手, 無奀皮仔喺度, 所以我好放心; 大家玩咗一陣, 同佢哋講拜拜喇, 小朋友都依依不捨咁, 但再耽擱係無可能, 我都掛住自己嘅心肝寶貝嘛!
同佢哋喺係平台再兜多咗一陣, 再影吓相咁, 都出咗嚟好耐, 兩隻女都未正式落地行過, 都係落番樓下, 拖佢哋行一陣啦!
先比達達豬行吓, 佢雖然係比之前有進步, 但都係行到頭耷耷弓住個身; 不過佢對外界反應係有改進, 每次有人行近, 佢都敢抬起頭望住人; 比起以前緊張到猛轉圈已經係跨進一大步, 有進步就有無限可能啦!!
達達豬甩毛後今日係第一次無著衫仔, 雖然同正常都仲有一段距離, 但皮膚都比短短嘅毛毛遮蓋住, 見唔到肉肉, 咁都算見得吓人啦!
 |
| 會八卦, 叻女 ! |
再比波波落地, 經過咗係平台熱身, 佢比較放鬆喇, 見到狗狗有時係佢帶我轉身, 我跟住佢等佢隨心而行; 有時見遠方有狗狗, 佢會奮力跑上, 但到一定距離佢又會轉身, 我覺得佢係又想同狗哋玩, 又唔知驚咩嘢咁; 但我唔敢比佢同唔熟嘅狗狗接近, 我怕佢會吠時又怕佢再比其他狗狗嚇親!
波波呢種情況我要好小心, 唔可以再加添負能量比佢, 要慢慢等佢改變, 希望循序漸進有改善, 但我都係無乜信心 :)
 |
| 波波都算行得開心! |
到拖豆b行, 我叫姐姐推車仔, 同佢講今日多咗狗狗, 要打醒精神; 如果見有狗狗行近嚟就唔好推架車過去, 停一停擋一擋波波嘅視線, 等狗狗經過咗再前行!
同豆b行最無壓力, 佢唔會吠又唔怕狗狗, 大家街坊仲可以閒談兩句!
今日不經不覺原來出咗去好耐呀, 大家番到屋企都攰到即刻想瞓 :)
 |
| 不停有狗狗行過, 點避? |
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
