 |
| 相片連結 |
本來都諗住一車豬仔落平台行吓就算喇, 費事咁麻煩; 但琴晚瞓低落床, 都仲諗緊, 點先可以做得更好!
如果全部落平台, 對達達好唔公道, 佢雖然出到街表現緊張, 但我覺得佢係好enjoyed, 眼見佢一日比一日放鬆, 行得越嚟越好, 我唔可以一刀切剝削咗佢嘅歡樂時間!
達達都一定覺得自己有進步, 每次出去佢都好專心咁行, 仲越行越快, 呢個進步強化咗佢信心, 所以每次去完街佢都好開心, 瞓得好好!
我覺得達達需要見多D人, 聽多D外來嘅聲音, 等佢唔會咩都驚一餐, 所以比達達只係落平台, 又唔係咁啱!
波波真係需要一個緩衝期, 等佢慢慢適應點面對出外, 希望過一段日子佢心情平復, 唔會一出去就咁緊張啦; 今日帶佢落平台跑, 搭電梯都吠小朋友, 好彩人家媽媽唔介意, 話佢哋都有狗狗, 都明白波波係緊張!
可能落過雨, 今日地下濕立立, 遊樂場無小朋友, 比波波跑吓就最啱, 淨係佢一隻無咁張揚, 目標唔大, 就等佢開開心心咁跑一跑!
豆b就最易話為, 任何時段落街都唔會有閉翳, 佢又唔會吠小朋友, 又唔怕狗狗, 我就唔會咁緊張啦; 網上睇番嚟嘅都話狗狗專鍾意攪D緊張嘅狗狗, 可能波波咁吠係一種挑釁, 所以每次見到放繩狗都真係會衝向波波; 反而達達自顧自咁密密行, 完全無用佢哋嘅語言作互動, D狗狗都只會觀望, 好少直衝向佢; 豆B更家唔使講, 佢態度自然, 狗狗會過嚟打招呼, 佢都有繞圈大家聞吓, 只要唔係大大隻嘅放繩狗, 我都由得佢進行社交!
3隻豬都有唔同需要, 如果要做到最好, 需要靈活變通吓, 唯有分3次出街啦!
今日先係中午帶達達, 正正係放學時間, 我想佢習慣吓喧鬧; 達達無不安,其實佢真係有進步, 只要唔好突然伸手摸佢, 佢都會伸長頸仔望望吓!
下午帶波波, 任佢隨心所欲咁跑一吓, 無其他狗狗, 又無小朋友, 佢自然唔緊張啦, 而我都放鬆晒, 呢個互相影響嘅訊息比到波波relaxed啦!
傍晚帶豆B出去喇, 傍晚係最多狗狗, 但無緊要啦, 豆b唔怕我就唔怕; 不過我都會提高警覺D放繩狗啦; 每次都一樣, 豆b一出動就落雨喇, 行得一陣間 :(
不過豆b都唔鍾意行, 同佢出過去佢就好滿意喇!
分三次出去都幾攰, 我諗我好難堅持每日咁做, 但隔日咁做都ok啦!
其他時間等佢哋一齊喺平台玩, 希望配合好時間, 唔會影響到其他住客, 唔會有麻煩啦; 依家我都係見有其他人喺遊樂場, 我就一定唔會放佢哋落地下, 都係坐住車仔週圍行吓, 希望我嘅自律令大家唔會有反感啦!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
