今日, 達達豬嘅毛髮回復舊觀距離在望, 係時候同佢呢個脫毛症X closed file!
我同達達豬終於都走過咗最艱苦嘅時候, 回望過去, 有徬徨, 有失望; 尤其唔知應該走邊個方向, 何去何從!
最感難過嘅就係前路茫茫, 乜嘢係BSD? 點解脫毛會揾唔到原因? 點解會係X檔案? 網上資訊指明Alopecia X係無正統治療方法, 無法對症下藥; 勇於嘗試嘅醫生會用上melatonin去幫忙, 如果無好嘅效果, 就蓄手無策, 規勸唔好心存太大希望, 因為一直都話Alopecia X係無損健康, 長唔番毛毛就算喇!
我一直都好疑惑, 一個健康嘅身體真係會毫無原因咁就全身披毛甩光?
狗狗唔識講, 佢有無覺得身體唔舒服? 單憑驗血指數正常, 咁就算健康? 我記得之前睇過美國狗狗Frodo嘅個案, 佢都係用西藥無效, 去揾中醫幫忙; 中醫斷症為肝血不足, 用補肝湯同薑黃素呢類補藥去調理, 而呢種氣虛血弱等等嘅情況, 又確係驗血都睇唔出有異狀!
明顯達達甩毛其間, 佢有情緒病; 雖然佢一向都係緊緊張張咩都驚, 但唔會好似甩毛其間咁失落; 但真正原因, 仍然係一個謎, 究竟佢係身體唔舒服, 所以表現異常, 還是因為無咗毛毛, 導致佢情緖受影響?
我永遠唔會知道答案, 達達豬又唔識講 😞
今次達達豬僥倖生番毛毛, 我用咗唔同嘅方法, 其實都係用上不同補充品, 作用都係強化佢嘅健康; 深信一個強壯嘅免疫系統先可以打勝仗, 無論係乜嘢原因導致脫毛症X, 有一個強壯嘅免疫系統先可以自我幫忙; 我諗今次達達可以再次打嬴呢場仗, 從深層調理到外用補充, 加上參考好多案例, 從中學習嘗試, 成績先有咁理想 🙂
再一次多謝我嘅好朋友, 網友; 用行動, 留言, 送上鼓勵支持, 同好多有用嘅提議; 等我喺絶望邊緣, 再重燃希望!
今次同達達走過咗呢條艱辛嘅路, 比我一個啟示, 再大嘅困難只要你堅持嘗試, 仍可能揾到出路, 相反因失敗氣餒而放棄，就無人可以幫得上忙!
有BSD狗狗嘅家長, 要堅持落去呀!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
