避開壓力源頭

 

 今日姐姐放假, 佢話有朋友開生日會, 佢想參加; 其實佢邊日放假我都無所謂, 只要我無特別事做, 我絕對唔會留難, 我願意方便佢, 等佢開開心心, 好好咁做好本份, 唔會心懷怨懟!

姐姐放假我無可能一拖三出去, 而且今日又落雨, 中午仲落到好大, 唯有喺屋企陪佢哋玩啦, 3隻豬仔真係好嗲架, 隻隻都走埋嚟喺我身上鑽嚟鑽去, 好鬼好玩!

一路都天黑黑, 都諗住無得出去喇, 點知等到傍晚, 雨停晒!
 雖然條街好濕, 如果係以前我一定唔會出去, 覺得好污糟呀; 但為咗比波波多D運動量, 發洩下佢過盛嘅精力, 都決定帶佢出去行, 最多格外留心, 去完街再小心清潔檢查啦!

傍晚都大風, 吹起咗地上嘅落葉, 嚇死波波呀 :) 
見佢伸長條頸望住前面, 又唔敢行, 我停低等佢選擇; 如果佢要走回頭路我會隨行, 出嚟都係想佢開開心心, 無謂勉強, 不過佢好叻仔, 好勇敢嘗試前行!

今日唔多狗狗, 只遇見兩隻, 同我哋距離好遠; 明顯波波都見到狗狗, 但距離咁遠佢覺得無威脅, 佢唔緊張, 無吠; 狗狗吠同撲都有一定原因, 有人話佢係緊張, 係驚先會吠同撲, 虛張聲勢作出防護動作; 既然係咁唯有盡量避開壓力嘅源頭, 我有試過去做友善訓練中嘅減敏動作, 但唔太成功; 咁唯有拉遠同其他狗狗嘅距離啦, 只要去除引發吠叫嘅因素, 佢就唔會吠, 亦唔想加強佢吠撲嘅習慣!

http://www.petcorrector.com/

坊間有好多產品幫狗狗停止吠叫, 例如一D噴霧; 一吠就噴, 咁係有可能停止佢呢個行動, 因為狗狗怕咗呢個懲罰, 佢唔敢吠; 但呢種做法係Negative Reinforcement, 我唔捨得咁對波波, 我唔想為咗阻止佢吠而懲罰佢,加添佢嘅壓力; 如果我怕曱甴, 見到會尖叫, 而你一定要我接觸佢, 仲唔比我叫, 我真係會發癲; 同一道理, 我何必強逼波波去面對佢嘅憂慮呢? 我選擇避開算喇, 我只可以咁做!  

波波係男仔, 比起兩隻女真係體力較旺盛, 需要多D運動量, 帶佢出過去明顯係平靜咗, 我唔會懶 :)

多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！