動物行為 (w/album)
呢兩日好努力刨台灣戴更基醫師嘅動物行為講座, 老實講, 佢講嘅嘢好多時我都有做, 但永遠都係做唔好, 唯一嘅原因係因為我自己 - 太緊張!
我一直都係一個好緊張嘅人, 每每太多顧慮, 戴醫師所講叫唔好set一個死實實嘅程序去跟從, 要輕輕鬆鬆去面對; 但我就係輕鬆唔起嚟, 所以我再努力都注定白費 :(
每次帶波波出去, 我都開始緊張, 怕有放繩狗衝埋嚟, 腎上腺上升, 波波一定感受到; 到見到狗狗, 遠距離我唔驚, 波波都跟住唔驚, 當狗狗行近我開始緊張, 波波感受到我緊張, 就會做出預期嘅緊張反應, 咁互相影嚮, 惡性循環!
見到小朋友原理都一樣, 我怕佢哋會攪波波, 所以我緊張, 呢種緊張係自己都唔察覺, 但波波完全讀取我心所想, 久而久之, 見到小朋友吠成為習慣, 一時間改變真係好難!
好多練狗員都話訓狗先要訓主人, 我完全明白, 我好清楚問題徵結, 但要我改變真係好難! 帶佢哋出去, 我真係身不由己咁會緊張, 都因為太保護佢地, 一諗到有狗狗活活被咬死, 我就好心寒!
簡單嚟睇, 波波達達有時會爭執, 點解我覺得達達會讓波波, 因為佢地透過遊戲已經分出高下, 達達明白自己係唔會嬴, 所以有起爭端, 佢選擇走咗去!
佢哋無論玩得幾激, 我從來都唔會擔心佢哋受傷, 所以直接影嚮佢哋玩得開放!
相反豆b太唔識死, 性格自主進取, 每次佢想要嘅都會爭先去搶, 好快衝過嚟; 波波就好激氣, 咁爭執就開始 :(
佢哋爭執真係會打起上嚟, 而且都好狼死! 每次我都會將佢哋分開, 因為怕咬傷佢哋, 所以每一次都未分高下, 周而復始發生問題; 戴醫師話最簡單嘅解決方法係任由佢哋, 自己即刻入房關上門唔睇; 佢話狗狗最怕主人忽視佢哋, 佢哋一定會停止, 試多兩次就會明白媽媽唔鍾意!
但真係任佢哋咁打? 任佢哋打到受傷? 我擔心, 所以又係一個死結!
完全明白係我嘅問題, 但我唔可以承受失去佢哋, 每每過度保護就產生問題!
我依家明白點解喺平台佢哋玩得開心, 點解一群松松一齊gathering波波唔會吠, 因為係我放心場地無大狗嚟咬, 亦唔會有走失問題; 我心理因素傳達正面訊息去波波個腦, 所以佢反應正常!
我發覺喺屋企圍欄內佢哋最happy, 應該係安全感問題, 喺裏面佢哋好少發生爭端; 我改變唔到自己, 唯有改變時間同佢哋出去, 之所以波波去新地方較放鬆, 因為係我放鬆問題; 達達怕大車聲晌佢係好難面對, 可能細個經歷關係, 勉強要佢接受會觸發更大問題, 但同達達行舊地方我唔會驚佢撲同吠, 所以我無傳遞不良訊息比佢!
豆b由細環境培養佢大無畏, 自然大家都無壓力問題.
睇咗咁多動物行為課程, 都有所得著, 起碼認清方向, 係我嘅問題, 改變唔到自己嘅緊張, 唯有改變動場地, 希望大家會減低壓力, 可以開開心心咁面對難題:)
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
