 |
| 明顯唔開心嘅波波 |
琴日無同3隻豬仔出去, 自己出咗去整牙, 咁多次今日最攰,整咗個多鐘啊, 唔止張開個口咁耐覺得攰,做完成個人都散咗:)
下星期再去多一次就功德完滿喇, 輕鬆晒!
雖然呢個牙醫真係好好, 但整牙到底唔係一件快樂嘅事嘛!
另一個唔出去嘅原因, 想比波波休息吓; 本來出去跑吓係比佢減壓, 但遇到放繩狗仲令佢壓力增加, 見到佢依家行吓停吓, 仲緊緊張張咁兩頭望, 好確定安全先起步, 我好心痛呀!
本來係牽繩引發的攻擊行為, 係Barrier Frustration, 依家問題仲複雜咗!
曾經有個一段時間佢做得唔錯, 見到狗狗雖然好警覺, 但只要狗狗唔走埋嚟, 佢係唔會吠; 但骨刺後我又驚佢整親, 因為遇到放繩狗衝過嚟, 佢一定反抗, 拼命咁撲!
唔敢比佢再練習, 一見到狗狗就抱起佢走開! 但問題仍然存在, 除非我永遠唔同佢出去, 如果唔係點都無辦法避開其他狗狗, 唯有再開始友善訓練啦!
繫上黃絲帶再嚟過, 但無論我點努力, 一隻放繩狗就足以令我前功盡費,佢都未ready, 未可以從容面對障礙, 依家仲多咗一種傷害, 佢變得好緊張, 點算!
問題仲見複雜咗, 以前我叫come佢會好開心跑過嚟, 依家只會原地觀望, 好傷心啊!
呢兩日喺屋企再誘導佢, 用小食再訓練, 當然OK, 因為環境由我控制, 每次come都有好處, 當然有好嘅聯想啦; 佢一定要專注望我, 聽我講, 咁出去先可以用小食做訓練嘛; 但外面環境之前令佢有陰影, 出到去佢咁緊張東張西望, 連小食都吸引唔到佢, 好難攪啊!
我已經唔去寵物公園, 嗰度我預咗有放繩狗! 但公共地方馬路傍, 想唔被搔擾我行我嘅路, 咁都唔得? 咁都錯?
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
