琴晚半夜3點左右, 聽到圍欄床仔有D聲, 我坐起身望過去, 見達達打側瞓低, 手腳係跑歩狀態, 個心當下一沉, 唔通又抽筋?上次距離今次未夠3個月, 真係太密喇!
即刻跳落床行過去, 見達達仲瞓緊, 眼仔無張開但手腳郁緊; 我輕輕叫醒佢, 掃吓佢個身, 叫佢唔使驚, 然後慢慢扶佢坐穩!
達達無好似上兩次咁手腳硬晒, 面部表情亦無驚恐狀態, 同抽筋好唔同, 佢望住我一陣然後慢慢爬低, 再瞓覺!
唔通今次佢唔係抽筋? 只係發夢? 琴日去街太興奮, 發夢仲跑緊?
我寧願相信呢個推測啦, 如果3個月抽筋一次太密喇!
天呀唔好玩呢D啦, 我只係開心咗一日咋!
唔好嚇自己住, 再觀察!
但今早餵咗一次預防抽筋嘅順勢藥比達達, 根據label指引, 見到有就嚟抽筋嘅徵兆就可以服用, 咁我比達達食一次預防吓啦!
請求上天比我3隻豬仔健康D啦, 唔好隻隻豬日日嚟嚇我喇, 只係開心咗一日又從雲端跌返落地下, 成副骨頭散曬啦!
老公叫我凡事要睇開, 要嚟嘅擔心都無用嘛, 我哋對3隻豬已經極其疼愛啦; 可能我哋唔係世界上最完美嘅主人, 但絕對係盡晒我哋世界裡嘅全力去愛喇, 生命不在乎長短, 佢哋係此生無憾!
哎吔做乜要講到咁, 越講我越比佢嚇親, 達達今日一切正常, 做乜要諗到咁!
老公話達達琴晚應該係發夢喇, 無可能叫醒佢立刻正常返啦, 上兩次都有手脚僵硬, 要一陣先放鬆番嘛, 琴晚唔似有事啦!
佢話講比我聽係想我情緒唔好上落咁大, 所有喜怒哀樂比3隻豬仔控制晒, 雖知狗狗正常係比我哋先走, 我再係咁佢好擔心!
我知啦, 我又唔係未試過同狗狗say goodbye, 但我控制唔到擔心嘛 :(
如果, 我無咁醒瞓, 又如果, 3隻豬唔係瞓喺我附近, 我會少咗好多擔心; 但我唔容許咩都唔知帶來遺憾, 我唔係呢種人!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
