原來夜深人靜時個腦最活躍, 我每晚瞓咗落床個腦就好似裝住好多嘢想講, 所謂叫做有靈感啦; 但又懶得起身, 到咗第二日天光, 個腦就清空, 咩都唔記得晒 :p
呢兩日觀察住達達, 佢好正常, 唔覺有異常反應, 咁我唔再多想, 就當嗰晚佢係發夢啦; 其實都唔由得我話要點樣, 抽筋與否我都無得幫, 呢個只係我主觀嘅希望, 當然希望佢身體健康啦!
講到波波, 佢牙仔問題都非常困擾我, 每次見佢用手撥個面仔, 我都感覺唔安樂!
無奈醫生比3個選擇都係咁死火, 基本上係無得揀喎:-
1) 落麻醉藥, 但所有醫生都唔建議我呢3隻豬冒呢個風險!
2) 打鎮定劑, 但都有一定風險, 之前H醫生就好抗拒用呢個; 目前波波係有唔舒服, 但無關乎生命危險, 甚至無發炎, 我當然唔想博!
3) 強行扯甩隻牙仔出嚟, 葉醫生話會痛, 亦會血流得比正常多, 最大問題係驚嚇親佢喎!
咁可以點? 都唯有靜觀其變, 目前波波食嘢都無問題, 我希望佢快D自動甩咗呢隻牙仔啦, 如果等到有日影響到佢食嘢, 先再諗喇!
波波係較敏感, 係"蛇瓜"仔,之前達達都有甩過大牙, 都唔見會咁囉!
豆b暫時OK, 唔敢讚佢喇, 呢D衰豬好小氣㗎; 養呢幾隻豬, 攪到我變咗個八卦迷信嘅人;)
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
