 |
| 相片連結 |
波波食咗3日耳水不平衡嘅藥, 今日好似好咗D喎, 咁老公話不如去寵物公園比佢哋走走!
對於寵物公園, 我一向視如洪水猛獸, 以前波波未咁抗拒狗狗, 無又嘈又緊張嘅時候, 我就怕有甩繩大狗, 總係諗到會狗咬狗, 一發不可收拾!
依家波波咁抗拒其他狗狗, 我更家唔會喺呢種地方逗留, 一向見到狗狗都走夾唔透, 仲點會自動去狗公園放狗?
老公話去到覺得唔適合可以即刻走, 見到有放繩大狗咪唔好停留, 又唔係一定要放佢哋落地走, 睇過情況先決定要留定要走囉; 佢叫我唔使諗咁多, 擔心更多餘, 去行吓係好小事, 又無比人用槍指住, 唔使好似赴刑場咁慘喎!
真係比佢氣壞, 咁去就去啦!
去呢轉寵物公園真係唔錯嘅選擇, 或者係我一開始緊緊張張啦, 3隻豬都緊張埋, 不過入到去見到只係有幾隻poodle, 咁我放心晒; 雖然波波見狗就吠係例牌, 我叫老公推住車仔遠離有狗狗嘅地帶, 然後帶豆豆兩頭行!
豆b當然無問題, 跟住我慢慢行, 有狗狗過嚟都OK啦!
第二個到達達行, 叫老公拖個寶貝女喇; 達達都係行到舂舂吓頭向下, 但比起以前唔肯行都算係咁喇, 當然比起之前腰仔無事時係較差, 但邊有得比吖, 能夠咁樣行吓已經好好喇!
最後到個巴閉波波落地下, 一落地就緊張到眼仔瞪大晒, 見到狗狗坐到直吠到嘈晒, 雖然我頗尷尬, 但意外見到波波係可以坐到直番 :)
可能大家都係家長, 好體諒呢D少見世面嘅毛孩, 大都報以微笑, 叫狗狗唔好行咁埋; 於是波波可以自己喺公園嘅一角跑呀跑!
雖然我要陪跑真係熱到爆, 跑到身水身汗成身濕晒, 但見到波波全無病態, 我難以形容自己心情有幾咁輕快 :)
今日出去呢趟寵物公園真係無壞, 係一個正確嘅選擇, 去呢一轉將我嘅心結解開埋, 試問有重病嘅狗狗點可能咁跑?
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
