 |
| 波波到達診所都唔算緊張喎！ |
終於見到新醫生Dr.Fan, 佢無令我失望, 細心詳細問症, 比好多時間同我解釋; 然後從多方面推敲, 幫波波檢查身體, 每一part都非常仔細, 牙仔, 眼仔, 再聽心肺, 然後全身按壓身體!
牙仔有牙石當然唔好啦, 但無口臭應該未有細菌感染, 唔算太大問題, 鬆咗嗰隻牙仔佢認為未致於令波波身體偏側咁嚴重, 都屬意等佢自然甩落嚟!
眼仔方面, 上次受傷嘅眼仔血管較粗, 唔知係咪未算完全好番, 我無問:( 但兩隻眼仔眼壓正常, OK !
耳仔清潔無事, 再檢查肌肉同神經反射, 認為神經方面係無問題!
但當Dr.F按壓波波右邊身體, 波波有震, Dr.F話波波係有痛啊, 佢話波波手臂位附近嘅筋應該有發炎, 導致淋巴有D腫!
我一直強調波波無痛, 因為佢同之前反應唔同, 無尖叫有食慾; 但其實佢有就住傾向左邊, 可能係唔想用右邊將疼痛加重, 只不過呢種筋骨肌肉腫痛, 同神經痛唔同, 無尖銳嘅刺痛, 所以波波頂得順!
由於一開始我有同醫生講波波每食西藥反應都唔好, 肝酵素會高, 我唔想用嗰類西藥止痛, 我嘅意願佢尊重; 佢話溫和嘅做法可以試用針灸, 喺屋企我就用紅外線照射、 熱敷, 亦可以照常用順勢療法, 因為右邊筋有發炎,暫時唔好用艾炙幫佢碌!
波波生性緊張, 醫生話無十成把握針灸會幫到, 如果我仍屬意照做, 佢樂意試做!
當然我希望幫到波波唔痛嘛, 試吓啦！
結果係 - 針係落到, 但波波並唔鬆弛, 25分鐘嘅療程都無放鬆, 肌肉繃緊晒, 眼仔瞪到好大, 即係呢套治療唔適合佢喇; 但醫生超好人, 用人手幫波波穴位按壓, 將右邊嘅筋肌放鬆晒, 波波就非常受落仲瞓覺!
但Dr.F話佢唔係每次都有時間用人手去按壓㗎 ;)
 |
| 做完按壓開心好多 |
佢話狗狗年紀開始大, 呢種筋絡疼痛, 天氣潮濕多會出問題; 唉, 潮濕天氣快D走啦!
估唔到我咁勤力去幫佢哋做物理治療, 仍難逃呢個痛症, 真係無計!
今次嘅診症比起上次相對令我放心, 更開心搵到個醫生同自己想法接近, 肯照顧我嘅意願會令我更安心; 咁當然醫生有熱忱, 細心又醫術高明, Priority 係number one啦!
尋尋覓覓去搵個好醫生, 實在太多醫療醜聞, 太老資格太有經驗又驚會按先前病例有代入感, 會掉以輕心; 太年輕資歷淺又怕醫術未到家, 難成大任!
但一個好醫生真係首要有愛心, 要事事從病者方面利益去諗!
 |
| 真係一間有HEART嘅診所 |
你可以話我固執又緊張, 但我真係唔想拖延, 個仔嘅身體健康寶貴毫無疑問; 即使以後突發生出問題, 但我已盡咗我最大能力, 我問心無愧!
搵唔到原因就無得講, 搵到原因但幫唔到係會失望, 但唔去搵原因又或者感覺有問題都當無事, 我點可能安心!
無錯之前已經睇過醫生, 係應該放心, 但醫生無整日觀察到波波, 個仔有唔妥我係最清楚; 憑表面情況去推斷醫生係無錯, 但如果醫生可以更細心, 從多方面思考會有更大幫助!
我要求真係高, 我諗一般醫生都怕咗我, 幫我嘅狗狗睇症壓力大好多 :D
今日醫生由開始聽我陳述、 做檢查、 針灸、 按壓、 比解釋我, 足足用咗一個半鐘, 係我睇醫生以來, 最耐嘅一次啊!
 |
| 返到屋企即做熱敷囉！ |
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
