波波情況都係差不多, 有時我覺得佢有好咗, 有時又覺得佢無好過!
唯一安慰係佢精神同食慾都好好, 除咗有側身就住行, 大部份時間仲會走嚟走去玩!
真係怕咗佢, 可能休息唔夠難好番, 琴日開始大部份時間將佢困籠, 除咗3餐時間放出嚟行吓, 自由行只有去便便時間!
希望休息多D會快D康復, 除此之外就勤力同佢照燈熱敷, 我都唔知仲有咩好做喇!
今日老公放假, 比佢壞我大事啦, 放咗達達上床同佢玩, 到咗夜晚, 隻女又唔肯落自己床瞓覺喇 :(
尤其見到波波困籠, 要一"水"隔天涯, 隻豬女嘈生晒; 我一於唔理唔睬唔縱壞, 但呢隻女耐力驚人, "吖 、吖"叫足一個鐘, 肉赤到老公爆!
 |
| 隔開咗波波, 達達更加唔肯剩低自己一個啦! |
佢唔理我反對就抱咗達達上大床, 唉! 隻刁蠻女即刻瞓覺 :'(
真係咩世界, 比隻豆丁鬥嬴我成條街, 有老公back up隻豬仲唔作怪咩!
今日輪到豆b有軟便, 我除咗苦笑真係唔識表達, 還好未至於太差, 佢精神仲好好, 有興趣拎玩具玩!
多謝A今日轉咗佢朋友嘅一段對話, 原來佢朋友嘅狗狗, 有抽筋症狀, 咁帶狗狗去見醫生, 佢醫生嘅解釋令我安樂晒! 醫生解釋痙攣唔同抽筋, 抽筋係腦神經問題, 抽筋時會唔清醒㗎!
佢嘅狗狗係好清醒, 只係身體部份神經突然調節唔到而痙攣, 仲多數發生喺緊張嘅時候, 當狗狗自己感覺到唔郁得, 就更緊張, 痙攣更利害, 所以要盡量令佢快D放鬆番!
咁情況同達達一樣喎, 達達應該都係痙攣而唔係抽筋, 可能兩次都係發惡夢令佢緊張, 我安撫佢後佢就放鬆番, 之後就無事喇!
點解之前我問嘅兩個醫生都無咁講㗎? 可能佢哋自己知道唔係嚴重問題, 就淨係叫我觀察啦; 但如果有呢個解釋, 我唔使一直提心吊膽嘛!
可能老天爺見到A/B/C咁排住隊同我玩, 驚我爆燈喇, 比個開心消息我中和番, 哈哈!
多謝A充當使者傳話, 感激佢關心達達, 真係多謝晒!
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
