物理治療每日都keep住幫3隻豬仔做, 希望可以幫到佢哋嘅筋骨脊椎唔好有事, 唔惡化已經好好; 對於佢哋嘅身體健康, 可以做嘅我都盡量去做, 實在覺得養呢3隻豬唔容易, 頗辛苦!
其實同一時間養3隻狗狗係咪太多? 我從來都無諗過, 見到佢哋有個玩伴, 古靈精怪真係樂趣頗多, 當然相處會時有爭執打交係激死我!
養3隻狗狗, 付出嘅唔只係3倍精力, 真係無諗過！|
我唔係無試過同一時間養多於一隻狗狗, 養4寶時都無咁嘅感覺, 當然有生命嘅個體難免身體會出毛病, 但真係無好似依家咁此起彼落, 問題一個接住一個!
能夠正正常常咁出去散個步就視之為美好, 果真係比我深深感受到, "幸福唔係必然, 唔係隨手都可以得到"!
有人話狗狗係我哋老師, 佢哋嚟係將我哋教導, 咁的確因為佢哋, 有好多嘢係體會到; 但我唔係一個好學生, 性格太頑固, 知道係一回事, 但就好難去做好; 或者係咁, 佢哋就密密出事要將我教好 :(
佢哋要我知道, 好多嘢係無回報, 好多事做咗會係吃力不討好; 好多時都會事與願違, 遇到荊棘滿途; 即使你用咗200倍精力去做, 結果仍係會失望, 付出同收獲唔會係等號!
佢哋亦話比我知, 健康寶貴, 無好嘅身體, 一切徒勞!
快樂無一定公式, 每個人有唔同方法得到, 只要無影響人哋, 就按自己意思去做; 畢竟人哋認為係應該咁做, 情理上應該係咁做, 但加諸自己身上未必討好, 與其勉強去做, 不如按自己意願快快樂樂咁做仲好!
老師係有教導, 但我學得唔好, 我知道 ;)
多謝大家一直支持這個小天地, 不過本blog的內容及照片, 不希望在其他媒體上轉載, 多謝留意及支持！
